Tribunál Distritál Dili (TDD), ohin, hala'o primeiru interrogatóriu ba arguido na’in 9 ne'ebé deskonfia envolve iha kazu taa aman ho oan iha Hera. Imajen/Nelson de Sousa

DILI, 18 fevereiru 2020 (TATOLI) – Tribunál Distritál Dili (TDD) liu husi audiénsia primeiru interrogatóriu, ohin, seidauk foti medida koasaun ba arguido na’in sia  (9)  ne’ebé deskonfia envolve iha kazu asaltu no taa aman ho oan iha Aldeia Hali Dolar, Suku Hera, Postu Administrativu Kristu Rei, Munisípiu Dili sábadu kalan (15/02/2020).

Notísia Relevante : Taa Malu iha Hera, Na’in-rua Kanek

Arguido na’in ualu ne’ebé polisia kaptura no kumpre ona detensaun oras 72 nia laran iha sela polisia, kompostu husi arguido MS, AP, AR, MDS, CDA, DN, JP, DS ho AS.

Defeza Gil Amaral ne’ebé fó asisténsia legal ba arguido sira esplika, tribunal seidauk iha desizaun ba nia kliente sira tanba Tribunál presiza sei halo analiza ba medida husi parte prokuradór.

“Maibé desizaun ne’ebé ohin foti mak tribunal liberta arguido ho inisiál JP  tanba sei ki’ik (menoridade) bazeia ba kódigu penal artigu 20,” hateten Gil Amaral.

Audiénsia primeira interrogatóriu  ne’ebé prezide husi Juiz singular Maria Solana, adia hikas ba kinta (19/02/2020), tuku 12:00 Otl, hodi foti desizaun ba medida koasaun.

Iha audiénsia ne’e, parte Ministériu Públiku reprezenta husi Prokuradór Claudio do Rosário no arguido sira hetan asisténsia legal husi Defensór Públiku Gil Amaral.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here