Embaixador Timor-Leste ba Filipina.Imajen Midia PM

DILI, 18 fevereiru 2020 (TATOLI)-Embaixadór Timor-Leste ba Filipina, José Gaspar Piedade, tersa ohin, relata situasaun Timoroan atus tolu resin maka dadaun ne’e hela iha Nasaun Filipina ba Primeiru Ministru Taur Matan Ruak, iha Palasiu Governu Dili.

Diplomata Timoroan ba hateten liliu relata ba Xefe Governu kona-ba prosesu aprendijazen hosi estudante bolseiru sira-nian.

“Ohin ha’u mai hasoru Primeiru-Ministru atu atualiza informasaun balun kona-ba situasaun atuál ne’ebé mak estudante Timoroan sira-nian iha Filipina sira-nia aproveitamentu ne’e oinsá, di’ak ka la di’ak. Maibé kondisaun no situasaun sira hotu la’o di’ak,” dehan José Gaspar Piedade ba Jornalista iha Palasiu Governu.

Antes ne’e, Timoroan 400-resin maka hela iha Filipina kompostu hosi Estudante, Misionáriu sira no seluk tan, maibé dadaun ne’e númeru ne’e ba 300-resin tanba estudante barak maka fila ona mai Timor-leste tanba remata ona sira-nia estudu.

Nia informa iha sorumutu ne’e, PM Taur Matan Ruak, apresia no louva ba estudante bolseiru sira tanba barak maka aproveita estudu ne’e ho di’ak.

“Primeiru-Ministru (PM) sente satisfeitu tebes tanba estudante ita nian sira ne’e hetan aproveitamentu ne’ebé di’ak tebes tanba ha’u hato’o ba Primeiru-Ministru (PM) katak ita-nia joven Timoroan sira hili Filipina hanesan nasaun ida ne’ebé di’ak liu ba sira atu estuda iha ne’ebá,” nia tenik liután.

Entretantu, bolseiru na’in 17, finánsia hosi Governu no Bolseiru na’in 14 finánsia hosi Sentru Rejionál ba Sudeste Áziatiku ba Estudu no Peskiza Pos Graduasaun Maestradu no Doutoramentu iha Agrikultura (SEARCA-sigla inglés) maka dadaun ne’e sei kontinua sira nia estudu iha nasaun Filipina.

Alende ne’e, tuir dadus hosi Gabinete Adidu Edukasaun Timor-leste iha Filipina rejista estudante na’in 151 finánsia hosi família ida-idak mós sei estuda iha Filipina.

Jornalista: Hortencio Sanchez

Editór     : Agapito dos Santos

HAKEREK NO HATÁN

Please enter your comment!
Please enter your name here