Diretora Jerál EDTL, Arlinda Miranda Manetelo. Imajen/Florencio Miranda Ximenes

DILI, 18 fevereiru 2020 (TATOLI)–Maski daudaun ne’e Governu uza hela Dotasaun Orsamentál Temporária (DOT) hodi sustenta mákina Estadu, Eletrisidade Timor-Leste (EDTL) ne’ebé fó servisu atendimentu direta ba públiku, kontinua esforsu atu garante eletrisidade lakan ho normál iha territóriu tomak.

Diretora Jerál EDTL, Arlinda Miranda Manetelo, informa orsamentu duodésimu sei la afeta ba servisu tékniku eletrisidade atu kontrola no halo manutesaun ba sistema distribuisaun.

“Ita maski hasoru impase polítika durante fulan-rua (janeiru no fevereiru) no uza orsamentu duodésimu hodi hala’o atividade, maibé ami hanesan Diresaun Jerál nafatin buka meiu atu garante ahi lakan normál”, tenik  Dirijente ne’e ba Agência TATOLI iha knaar-fatin, Caicoli, tersa ne’e.

Nia afirma, durante Governu la’o ho rejime duodesimál, EDTL seidauk hasoru manutensaun ne’ebé grave no presiza osan ho montante boot.

“Ahi mate tanba iha fallansu. Ita hadi’a sasán hanesan trafo, fiu no kontadór ruma ne’ebé aat bele foti iha armazein,” nia akresenta.

Notísia Relevante: MOP Planea Hadi’a Sistema Distribuisaun Liña Eletrisidade

Maski nune’e, nia dehan, kuandu sasán iha armazein laiha tenke halo proposta ba Diresaun Jerál Finansa iha Ministériu Obra Públika (MOP) atu autoriza foti osan iha fundu kontijénsia.

Diretora ne’e rekoñese, dalaruma ahi iha área balun mate-lakan tanba sistema liña distribuisaun ne’ebé eziste tuan ona, nune’e mós distribuisaun liña eletrisidade ne’ebé sei manuál difikulta tékniku EDTL halo manutensaun bainhira avaria.

“Ita sei uza sistema manuál tanba ne’e ita falla kuandu feeder balun aat, tanba sempre han oras kle’ur mak ita bele deteta no halo manutensaun”, nia subliña.

Ho problema ne’e, Diretora ne’e informa Governu liuhosi MOP prepara ona planu atu halo dijitalizasaun ba sistema husi orsamentu empréstimu.

MOP rasik aprezenta ona programa ne’e ba Konsellu Ministru no momentu ne’ebá Xefe Governu sei pondera atu tau iha programa 2020.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here