Alunu foun na’in 36 hasai fotografia hamutuk molok tuir kursu iha IDN-TL. Imajen/IDN-TL

DILI, 18 fevereiru 2020 (TATOLI)- Institutu Defeza  Nasionál Timor-Leste  (IDN-TL)  iha loron 17 fevereiru  2020,  hahú  simu ona alunu foun na’in 36 hodi tuir Kursu Promosaun Ofisiál Superiór  (KPOS) ba dala V.

Notísia Relevante : IDN ho UNTL Estabelese Kooperasaun ba Kapasitasaun Defeza no Seguransa

Alunu foun sira ne’e mai husi ofisiál Komandu FALINTIL- Forsa Defeza Timor-Leste (F-DTL) ho diviza kapitaun na’in 20  no ofisiál komandu PNTL na’in 16  ho diviza Inspetór Xefe.

Tuir oráriu ne’ebé Ajénsia Tatoli asesu husi IDN-TL, ohin, katak, formasaun V KPOS ne’ebé hahú ona sei termina iha loron 17 dezembru   2020.

Iha loron dahuluk, alunu konjunta ne’e aprezenta sira nia aan no introdús identidade husi kada instituisaun. Alende ne’e, sira kontinua hetan formasaun kona-ba regra durante  formasaun  tenke ko’alia ba malu ho lian Portugés.

Diretór Interinu Formasaun no Ensinu IDN, Tenente Koronél “Punu Fanu” hato’o benvindu ba alunu foun atu fó tempu másimu hodi fó susesu ba kursu ne’e.

Tenente Koronél Punu Fanu, dehan, formadu sira tenke ko’alia Lian Portugés hodi hatoman sira nian aan  hodi kompriende lian Portugés,  tanba durante kursu matéria hotu formadór sira sei esplika ho lian Portugés.

“Mensajen ba alunu V KPOS atu esforsu aan nafatin manan koñesimentu ruma husi matéria ne’ebé hanorin  husi formadór sira, durante tinan ida nia laran,  atu sira bele forma aan  sai lalenok  bainhira sira fila ba sira nia instituisaun ida-idak,” dehan Tenente Koronél Punu Fanu.

Iha fatin hanesan, Diretór Akademia IDN, Guilherme Soares  fó hanoin ba alunu sira atu aproveita oportunidade hodi hasa’e sira nia abilidade pesoál.

Durante kursu, IDN sei apoiu mós ekipamentu pedagójiku nian hanesan laptop modernu  hodi fasilita sira  nia prosesu kursu.

Kona-ba formadór sira, tuir Diretór Akademia IDN katak, tinan ne’e IDN enfrenta dezafiu iha orsamentu hodi la lori formadór husi Universidade Lizboa, Portugál mai hanorin alunu  V  KPOS.

Tuir planu, IDN sei hala’o parseria ho universidade sira iha rai laran  hodi halo formasaun ne’e, inklui formadór husi universitáriu sira seluk hodi kolabora iha ámbitu kursu KPOS no formasaun seluk iha área defeza no seguransa.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here