Ilustrasaun Violénsia Doméstika. Imajen/Google

DILI, 17 fevereiru 2020 (TATOLI)-Tribunál Distritál Dili (TDD), ohin, halo julgamentu ba arguidu TF ba kazu Ofensa Integridade Fízika Simples ho forma Violénsia Doméstika (VD) hasoru lezada  DC nu’udar arguidu nia kaben.

Tuir akuzasaun Ministériu Públiku (MP) katak, iha loron 12 outubru 2019 iha hela fatin Becora, Postu Administrativu Kristu Rei, Munisípiu Dili, arguidu no lezada diskute malu kona-ba atu bá lia husi parte arguidu nian, tanba lezada lakohi bá, derrepente TF uza ventuiña tuda ba lezada DC ninia kotuk laran to’o bubu, no basá tan lezada dala ida iha parte hasan.

Arguidu nia hahalok ne’e kontra lei, tanba ne’e MP akuza arguidu ho krime Ofensa Integridade Fízika Simples ho forma Violénsia Doméstika (VD) ne’ebé previstu iha artigu 149 Kódigu Penál Timor-Leste.

Hatán ba akuzasaun ne’e, arguidu konfesa ho onestu ho akuzasaun sira-ne’e loos hotu no prátika duni aktu krime ne’e, tanba momentu ne’ebá nervozu. Nune’e, parte lezada mós konfirma ho akuzasaun katak, arguidu halo duni aktu krime ne’e hasoru nia.

Rona tiha deklarasaun husi parte arguidu ho lezada, tribunál deside adia hikas fali julgamentu ne’e ba tempu seluk hodi rona alegasaun.

Audiénsia julgamentu ne’e, prezide husi juiz singulár Ivan Antoninho, MP reprezenta husi Prokuradór Nelson Carvalho no arguidu hetan asisténsia legál husi defensór públiku.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here