Prezidente MAEKOM, Rui Manuel Castro. Imajen/Eugénio Pereira

DILI, 17 fevereiru 2020 (TATOLI) – Prezidente Movimentu Asaun Ekonomia Komunitária (MAEKOM), Rui Castro, bandu membru sira atu labele husu subvensaun husi Governu, nune’e bele buka meiu rasik hodi hala’o investimentu.

 “Iha MAEKOM rasik, ha’u hakarak dehan de’it ba membru sira ne’ebé maka hala’o atividade hakiak Manu Broiler, labele husu osan subvensaun ba Governu no parte parseiru sé de’it ne’ebé maka iha Timór, tanba atu fortifika ita bo’ot sira nia atividade investimentu ne’ebé MAEKOM halo”, tenik Prezidente MAECOM iha ninia diskursu iha atividade kolleta Manu Bloiler iha Metinaro, segunda ne’e.

Emprezáriu ne’e konsidera, dala-barak osan subvensaun ne’ebé simu halo ema sai baruk atu hala’o atividade negósiu no esforsu-an ba kualkér forma.

“Ezemplu kuandu Governu disponível fó subvensaun ba atividade ruma ne’ebé pesoál ida halo, kuandu osan subvensaun laiha ona signifika aktividade mós bele paralizadu totál. Ha’u lakohi membru sira halo atividade liuhosi osan subvensaun públika Governu nian no parseiru sira seluk. Ita tenke evita ida ne’e, tanba ita hakarak susesu iha vida negósiu hodi kontribui ba ekonómia ita-nia rai maka tenke buka rasik liuhosi ita-nia esforsu”, akresenta Rui Castro.

Nune’e nia enkoraja, emprezáriu sira hodi labele depende liu ba osan subvensaun públika husi Governu nian tanba atu susesu iha vida negósiu depende ida-idak ninia vontade.

“Maluk balun halo negósiu kiik, bainhira susesu oituan hakarak kedan fundu boot atu haluan sira nian atividade, tanba ne’e sira husu ajuda ba Governu hodi apoia sira, maibé fulan ida ka tinan ida halo negósiu hafoin hetan apoiu subvensaun públika, atividade la la’o ona. Ida-ne’e sala sé nian?“, nia kestiona.

Liuhosi biban ida-ne’e, nia husu Governu labele hatoman sidadaun sira hodi fó subvensaun, tanba ne’e parte ida halo baruk hanoin ba kreatividade atu halo negósiu.

Prezidente MAEKOM garante, to’o agora membru MAEKOM rasik seidauk uza osan subvensaun atu halo atividade investimentu ne’ebé dadaun ne’e MAEKOM halo.

“To’o agora ami nia membru sira seidauk husu osan subvensaun hodi fortifika sira nian atividade investimentu, tanba prinsípiu husi MAEKOM nian klaru katak atu susesu iha investimentu ne’ebé MAEKOM halo maka tenke buka osan rasik hodi kontribui ba ekonómia Timor-Leste”, dehan Rui Castro.

Iha fatin hanesan, Ministru Agrukultura no Peska, Joaquim José Martins Gusmão, apresia tebes ba hanoin ne’ebé MAEKOM aprezenta tanba bele eduka povu oinsá atu halo negósiu uza nia osan rasik no hetan osan rasik.

“Ha’u apresia tebes ba hanoin Señor Rui Castro nian ne’ebé maka dehan MAEKOM lakohi depende ba osan subvensaun hosi Governu. Ida-ne’e hanoin di’ak tanba oinsá atu eduka membru sira buka rasik osan”, nia dehan tan.

Governante ne’e promete katak, sei fó apoia téknika ba grupu MAEKOM atu haree no fó asisténsia ba Manu Broiler rasik.

“Ha’u hanoin ami sei la fó apoia direita ho osan subvensaun, maibé ami sei apoia teknikamente liuhosi fó asisténsia saúde nune’e bele kontrolu Manu Broiler”, nia realsa.

Ministru Joaquim konsidera, atividade ne’ebé MAEKOM halo nu’udar parte ida atu hasa’e aktividade ekonómia iha rai-laran, tanba ne’e Governu liuhosi Ministériu Agrikultura no Peska (MAP) iha obrigasaun atu halo akompañamentu nafatin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here