Koronél Domingos Câmara ‘Amico’ bainhira dada-lia ho Agência Tatoli hafoin atividade kolleita Manu Broiler iha Matinaro. Imajen/Natalino Costa

DILI, 17 fevereiru 2020 (TATOLI) – Iha atividade kolleita Manu Broiler iha Koronél Domingos Câmara ‘Amico’ ninia luhan iha postu administrativu Metinaro, nia rekoñese halo ona investimentu iha área pekuária tanba lakohi fó todan ba Estadu.

Tuir Veteranu ne’e, ema ho deviza boot hetan previléjiu to’o haluha-an hodi la fó kontribuisaun filafali liuhosi investimentu, tanba ne’e hafoin fila husi Indonézia nu’udar Adidu Militár, nia hala’o atividade hakiak Manu Broiler hodi bele ajuda ekonomia rai-laran.

“Dala-barak nu’udar veteranu, ami ba ezije ami nian direitu. Ha’u sente ida ne’e fó todan ba Estadu tanba Estadu rasik fó ona subsídiu maibé ita husu tan, tanba saida maka subsídiu ne’ebé maka iha ita la dezenvolve buat ruma”, tenik Koronél Domingos Câmara ba Agência TATOLI iha segunda ne’e.

Notísia Relevante: MAEKOM Kolleita tan Manu Broiler 2500 iha Metinaro

Nune’e mós nia realsa, objetivu atu hakiak Manu Broiler tanba konsidera investimentu ne’e di’ak no haree inisiativa investimentu ne’e mai husi timoroan sira.

Nia mós iha hanoin katak, tempu ona atu fó kontribuisaun ba nasaun, la’ós husu dei’it ba Estadu.

“Ami la husu osan no lakohi tane-liman ba Governu. Tanba bainhira Governu maka fó osan, ami sente la eduka ami. Tanba ne’e tenke iha idea ruma hodi dezenvolve buat ruma”, nia reforsa.

Koronél Domingos Câmara antes ne’e nu’udar Adidu Militár iha Jakarta, Indonezía durante tinan tolu no husi ninia saláriu durante mandatu mak bainhira fila Timór konsege halo investimentu iha pekuária.

“Ha’u nia saláriu nu’udar Adidu Militár, halo investimentu hakiak Manu Broiler. Tanba kuadu iha saláriu di’ak maibé la uza hodi halo buat ruma, ne’e ita la’ós sidadaun di’ak”, nia haktuir.

Tuir Amico, nu’udar veteranu ida hafoin liuhosi funu ne’ebé naruk, iha kompromisu katak tenke liberta rai no povu husi kiak no mukit.

Nia dehan, ba inisiativa ne’e maka tenke hadi’a-an uluk liuhosi hadi’a uma-laran, hafoinhakat ba oin hodi hadi’a ema seluk nia vida hodi kontribui ba Estadu.

“Ha’u ema veteranu 24 anos. Iha tinan 1999 ha’u hanoin halo funu ne’e todan, maibé bainhira to’o iha vila ha’u haree atu hadi’a povu nia vida mak todan liu”, nia akresenta.

Tanba ne’e, nia konsidera to’o ona tempu atu hadi’a povu nia moris liuhosi kontribuisaun iha atividade ekonómiku sira hanesan grupu Movimentu Asaun Ekonomía Komunitária (MAEKOM), nu’udar timoroan ne’ebé kria inisiativa hakiak Manu Broiler hanesan parte ida bele dudu ekonomia Timor-Leste.

“ Ha’u agradese tebes ba Señor Rui Castro ho ninia ekipa tomak ne’ebé ajuda ha’u atu hala’o atividade ida ne’e, hodi fó motivasaun di’ak no hanorin sidadaun hotu-hotu katak ita tenke halo serbisu ruma hodi hadi’a ita-nia ekonomia no ajuda ita-nia Estadu hodi labele husu de’it ita nian direitu no haluha tiha ita-nia dever”, nia dehan tan.

Veteranu ne’e salienta, investimentu ne’ebé maka dadaun ne’e nia halo hanesan hakiak Manu Broiler hamutuk 2500, bainhira kolleita ona bele ajuda fó serbisu ba ema seluk.

Nia rasik hatudu ona vontade ba atividade ekonomia ne’e no daudaun kria ona kampu traballu.

Iha fatin hanesan, Prezidente MAEKOM iha ninia diskursu iha atividade kolleita Manu Broiler iha Metinaro, apresia ho inisiativa Koronél Domingos Câmara nian, ne’ebé hola insiativa investe iha pekuária.

“Komadante ida ne’ebé hanesan ema luta-nain durante 24 anos, maibé kontinua hatudu nia seriedade hodi dezenvolve ekonomia iha nia rai rasik. Ida-ne’e hanesan orgullu ida ba ha’u tanba ema ne’ebé hanesan Komadante la hatene kolen no kontinua iha inisiativa dezenvolve ita-nia rai liuhosi atividade ekonomia”, nia salienta.

Iha sorin seluk, Ministru Agrikultura no Peska, Joaquim José Gusmão dos Reis Martin, apresia esforsu ne’ebé Koronélhalo tanba bele sai referénsia ha veteranus sira seluk.

“Nu’udar pesoál ha’u apresia no orgullu ho ema hanesan Komandante Domingos Câmara, ne’ebé  iha inisiativa di’ak hodi dezenvolve ekonomia liuhosi hakiak Manu Broiler. Ema veteranus 24 anos ida maka iha hanoin hodi dezenvolve rai no povu liuhosi atividade MAEKOM hanesan ezemplu ba veteranus sira seluk”, tenik governante ne’e.

Prezidente Kámara Komérsiu Indústria Timor-Leste (CCI-TL, sigla portugés), Oscar Lima, iha biban ne’e rekoñese ekonomia rai-laran atu la’o ho di’ak presiza partisipasaun husi parte hotu.

“Atu ita nian ekonomia dezenvolve di’ak, presiza ema hotu nian partisipasaun hanesan Komandante Amico halo, maski nia komadante ho deviza boot maibé iha hanoin atu dezenvolve ekonomia tanba labele hein de’it Governu. Tenke mai hosi sidadaun ida-idak nian kontribuisaun barak ka oituan”, nia realsa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here