Komandante Jerál PNTL, Komisáriu Faustino da Costa. Imajen/Eugénio Pereira

DILI, 17 fevereiru 2020 (TATOLI)- Komandante Jerál Polisia Nasionál Timor-Leste (PNTL), Komisáriu  Faustino da Costa, hamutuk ho Segundu Komandante Jerál, Mateus Fernandes, ohin, realiza enkontru jerál ho komandante unidade hotu- hotu, inklui Komandante munisípiu 12 ho Rejiaun Administrativu Espesiál Oe-Cusse Ambeno (RAEOA) hodi halo apelu atu hametin seguransa iha territóriu Timor-Leste.

Notísia Relevante : Hakerek Naran Xanana iha Parede, PNTL Konsidera Propaganda no Ajitasaun

Komisáriu Faustino da Costa dehan, PNTL no FALINTIL-Forsa Defeza Timor-Leste (F-FDTL) koopera nafatin hodi garante seguransa no hein kualkér desizaun polítika ne’ebé Prezidente Repúblika, Francisco Guterres Lú Olo halo ba nasaun nia di’ak.

“Apela nafatin ba komandante sira karik haree sitasaun propaganda polítika ruma mosu iha terrenu, PNTL bele foti medida ruma para garantia nafatin ita nia seguransa,” afirma Komisáriu  Faustino da Costa, iha Kuartél Jerál PNTL, Caicoli, Dili.

Iha enkontru ne’e Komandante jerál no komunidade munisípiu sira diskute mós implementasaun orden servisu no dezafiu servisu ne’ebé polisia sira hasoru hafoin orsamentu estadu sumba iha Parlamentu Nasionál.

Durante enkontru, komandante munisípiu sira aprezenta mós dezafiu ne’ebé sira hasoru, liu-liu iha munisípiu menus transporte atu halo operasaun no la iha kombustivel atu suporta servisu.

Responde ba preokupasaun ne’e, Komandante Faustino dehan, parte komandu hato’o ona pedidu ba governu liu-liu apoiu manutensaun ba transporte no apoiu kombustivel ba polisia hodi halo operasaun atu garante seguransa.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here