Embaixadóra Portugal iha Timor-Leste, Joana Sousa Fialho Pinheiro no Ministra Solidariedade Sosiál no Inkluzaun (MSSI), Armanda Berta dos Santos Hamutuk Reprezentante ONU iha Timor-Leste, Roy Trivedy Workshop ida Kona-ba Sistema Protesaun Sosial Timor Leste. Imajen/ Tatoli Egas Cristovão

DILI, 17 fevereiru 2020 (TATOLI)—Ministra Sosiál Solidaridade Inkluzaun (MSSI), Armanda Berta dos Santos hateten, Governu Timor-Leste (TL) halo kooperasaun ho Governu Portugal hodi fó apoiu tékniku ba Institutu Nasionál Seguransa Sosiál (INSS) nomós tékniku sira husi Ministériu Solidaridade Sosiál no Inkluzaun (MSSI).

“Objetivu husi simpóziu Nasionál ida ne’e ita atu bele fó formasaun ba ita-nia tékniku sira liuliu husi Institutu Nasionál Seguransa Sosiál nomós tékniku sira husi Ministériu Solidaridade Sosiál no Inkluzaun ninian hafoin simpoziu ne’e. Tanba ne’e, importante tebes ita halo kooperasaun ida ho Governu Portugál sira apoiu tékniku para bele haree kona-ba Seguransa Sosiál,” dehan Armanda Berta bainhira halo abertura ba Simpóziu Nasionál ho tema “Próximos Passos para o Futuru da Seguransa Sosiál em Timor-Leste” iha Otèl Timor, ohin.

Nia hatutan, liu husi formasaun ida ne’e fó formasaun ba tékniku sira kuaze hamutuk na’in 20 mak sei tuir formasaun ne’e atu bele mellora di’ak liután atendimentu ba públiku iha futuru kona-ba seguransa sosiál.

Nia subliña, husi Simpóziu Nasionál ida ne’e hala’o tanba serbisu hamutuk ho Governu Portugál, tanba Timor-Leste presiza referénsia no koñesementu di’ak husi Portugál.

“Ita iha sistema rua nomós iha sistema úniku ba seguransa sosiál mak rejime kontributivu nomós non-kontributivu ne’e ba institutu Nasionál Seguransa Sosiál nian. Tanba, ita mós presiza referénsia no koñesementu di’ak husi Portugal. Tanba ne’e mak ita serbisu hamutuk para oinsá ita atu bele jere orsamentu Seguransa Sosiál hodi bele investe ba iha futuru liuliu ba futuru família nian,” nia dehan.

Durante ne’e, nia informa, Ministériu Sosiál Solidaridade Inkluzaun (MSSI) hasoru difikuldade barak. Tanba ne’e, presiza enkuadramentu legál ba fundu rezerva ninian ba Seguransa Sosiál.

“Iha orsamentu Seguransa Sosiál, iha difikuldade nomós ita sei presiza enkuadramentu legál ba fundus nia rezerva ninian ba Seguransa Sosiál. Ne’ebé, tékniku sira sei prepara atu bele haree ba futuru oinsá para atu bele jere orsamentu Seguransa Sosiál nian ba oin,” nia haktuir.

Entretantu, Koordenadór Rezidente das Organizasaun Nasoens Unidas (ONU), Roy Trivedy hatutan, iha simpóziu nasionál ne’e importante tebes tanba ko’alia liu kona-ba protesaun sosiál iha Timor-Leste.

“Asuntu ne’e importante tebes tanba ami ko’alia kona-ba protesaun Sosiál iha Timor-Leste. Protesaun Sosiál importante tebes tanba ita influénsia ba bem estar (moris di’ak) sidadaun Timor-Leste nian. Entaun, ohin, ami hamutuk diskute kona-ba esperiénsia Portugál nian sira bele fahe ba Timor-Leste kona-ba protesaun sosiál,” nia dehan.

Nia hatutan, protesaun sosiál importante tanba kada sidadaun iha fundamentál atu ajuda suporta sidadaun seluk. Nia mós sujere Timor-Leste la’os atu adapta Sistema Portugál nian maibé Timor-Leste bele eskolla rasik sistema.

“Ha’u la sujere Timor atu adapta sistema hanesan de’it Portugál. Maibé, tenke refleta diskute ho valór sistema protesaun sivíl sosiedade iha kada país. Entaun, Timor-Leste tenke eskolla sistema importante ba Timor rasik,” nia esklarese.

Tuir nia, Seguransa Sivíl iha Timor-Leste maizumenus 40% sidadaun hasoru problema pobreza entaun protesaun sosiál importante atu proteje ba grupu hanesan ema ho defisiénsia no idozu.

“Iha nasaun ida tenke iha sistema rasik no Timor-Leste mós agora daudaun hala’o ona sistema seguransa sivil ne’e,” nia dehan.

Fundu ba Simpóziu Nasionál ne’ebé hala’o iha Otèl Timor ho tema “Próximos passos para o futuru da Seguransa Sosiál Em Timor-Leste” ne’e, husi Governu Portugál liuhusi Ministériu Traballu Solidariedade Seguransa Sosiál no Inkluzaun Portugal nian ne’ebé organiza husi Organizasaun Internasionál Traballu (OIT-sigla portugés) no Sentru Internasionál Formasaun (CIF& sigla portugés).

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here