DILI, 17 fevereiru 2020 (TATOLI) – Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, husu ba sidadaun hotu atu bele kontribui ba estabilidade no pás hodi promove sítiu turistiku Timor-Leste ba mundu.
“Ita atu promove imajen Timor-Leste ba mundu, liuliu ba ita nia sítiu turistiku sira ne’e presiza sidadaun hotu nia kontribuisaun hodi garante pás no estabilidade”, tenik liuhosi konferénsia impresa iha Sentru Konvesaun Dili (CCD-sigla portugés), segunda ne’e.Nune’e, dirijente ne’e kontinua enkoraja sidadaun hotu atu hamutuk promove imajen Timor-Leste ba mundu nu’udar destinasaun turístiku ne’ebé seguru no hakmatek.
“Ita presiza duni kontribuisaun ema hotu nian tanba iha informasaun katak bainhira ró kruzeiru foin lalais mai, pesoál taxista balun ameasa no husu osan $155 ba sidadaun estranjeiru sira. Tanba ne’e husu atu hapara aktu ne’e tanba hafoer imajen Timor-Leste,”nia akresenta.
José Filipe subliña, atu hatudu imajen Timor-Leste ba mundu asuntu importante mak tenke kontribui hodi soe fo’er iha fatin tanba sidade moos mak sei atrai turista sira.
Maske nune’e, Diretór ne’e rekoñese Timor-Leste ninia destinasaun turistíka seidauk maduru no estabelese didi’ak tanba sei iha faze emerjente no dezenvolve, maibé hatudu ona ba mundu katak iha destinasaun turistíka ida hakmatek no seguru.
“Ida-ne’e faktu iha fulan ida nia laran tanba ró kurzeiru rua mai vizita ona Timór, hatudu ita nia destinasuan turistíka ne’e seguru no hakmatek”, nia adianta.
Ein termu ekonomia, nia rekoñese Timor-Leste hetan benéfisiu husi taxa vistu, ró atraka iha tasi laran, trasporte públiku inklui artezenatu sira mós hetan benefísiu.
“Importante liu Governu tenke halo investimentu barak, liuliu ba hadi’a infraestrutura turístika sira, rekursu umanu no konetividade tanba ita iha difikuldade boot iha dezenvolvimentu turizmu. Ita haree gráfiku sa’e ne’e sinál di’ak tanba sira haree destinasaun turístika sira iha Timor-Leste di’ak ba produtu ró kruzeiru”, Quintas realsa.
Tuir nia, atu hadi’a infraestrutura tenke hahú husi modernizasaun Portu Dili atubele apropriadu ba atraka kruzeiru sira tanba lokaliza únika iha sidade Dili no asesu ba sítiu turístiku sira besik no fó vantajen ba produtu turizmu kruzeiru.
“Ita haree kruzeiru sira mai vizita ne’e hanesan turista puru ho ema ne’ebé iha osan duni atu mai gasta iha ita nia nia rai, tanba ne’e presiza hadi’a mós investimentu”, nia dehan tan.
Nune’e, nia husu ba futuru Governu presiza hadi’a mós portu iha munisípiu sira atu bainhira ró kruzeiru sira mai labele konsentra de’it iha Dili, maibé tenke ba mós munisípiu atubele haree fatin turístika istóriku iha munisípiu sira no ekonomikamente benefisia mós ba populasaun.
Iha tinan ne’e, Governu liuhosi MTKI loke oportunidade ba kruzeiru Pacific Explore ho pasajeiru na’in-2945 no kruzeiru Coral adventure ho pasajeiru na’in-85 hodi mai vizita Timor-Leste.
Enkuantu iha tinan 2019, kruzeiru neen mak mai vizita ona Timor-Leste kompara iha tinan 2018 kruzeiru haat de’it mak mai vizita.
Jornalista: Florencio Miranda Ximenes
Editora: Julia Chatarina
