Xefe Bankada CNRT, Duarte Nunes. Imajen Tatoli/Egas Cristóvão

DILI, 17 fevereiru 2020 (TATOLI)—Xefe Bankada Parlamentár CNRT, Duarte Nunes informa, bainhira Partidu Congresso Nacional da Reconstrução de Timor (CNRT) envolve iha koligasaun foun ruma sei deside liuhosi konferénsia partidu nian bazeia ba estatutu nia orientasaun.

“Tuir ami-nia estatutu kuandu iha koligasaun ruma ka iha saida ruma ne’e, ami sei halo konferénsia no sei deside hamutuk. La’ós kuadru de’it maibé estrutura hosi munisípiu nia reprezentante sira mai iha konferénsia ne’e hodi foti desizaun. Ne’e, ami-nia estatutu mak orienta ami hanesan ne’e,” dehan Xefe Bankada Parlamentár CNRT, Duarte Nunes, ba jornalista sira iha Parlamentu Nasionál, ohin.

To’o oras ne’e, Xefe Bankada CNRT ne’e hatutan, CNRT la halo esforsu tanba atu buka sé mós ema sei la simu CNRT. Maibé, tuir nia, se akontese forma governu, CNRT prontu no laiha liafuan ida atu la prontu.

Nia afirma, pozisaun partidu CNRT nian oras ne’e sei halo hela aprosimasaun hodi buka hela partidu seluk atu ko’alia kona-ba koligasaun foun. Maibé hein de’it tanba partidu mós seidauk fó órden no sei hein hela desizaun husi Prezidente Repúblika.

“Órden hosi partidu mós ami seidauk hetan. Ne’ebé, ha’u hein de’it. Ami hein desizaun Prezidente Repúblika, kuandu órden Prezidente Repúblika loos ona ema hotu tenke kumpre. Ita hotu-hotu hein desizaun Prezidente Repúblika, nasaun ne’e tenke la’o ba-oin. Ami, CNRT nia hakarak mak ne’e,” nia hateten.

Entretantu, Xefe Bankada Parlamentár UDT/FM, Francisco David Carlos hateten, durante ne’e partidu refere ko’alia ona ho partidu seluk inklui Partidu Congresso Nacional da Reconstrução de Timor (CNRT) maibé sira ko’alia informalmente de’it.

“Ami ko’alia ba malu hanesan informal. Depois, hanoin oinsá forma governu ne’e seidauk. Talves idak-idak nia laran bele to’o iha ne’ebá. Depois sei haree tempu badak, ami bolu malu ko’alia karik,” nia dehan.

Notísia Relevante : CNRT no PD Fiar PR Lú Olo iha Ona Preferénsia

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here