Eis Primeiru Ministru no atual Sekretariu Jeral Partidu Fretilin, Mari Alkatiri wainhira hasoru malu ho Primeiru Ministru Taur Matan Ruak iha Palacio Governu.Imajen/Media GPM

DILI, 17 fevereiru 2020 (TATOLI) – Eis Primeiru-Ministru (PM), Marí Alkatiri, observa daudaun ne’e ekonomia iha rai-laran ladún estável tanba situasaun impase polítika.

“Ekonomia iha Timor-Leste ne’e tun sa’e, la’os de’it akontese iha VIII Governu, maibé desde iha 2017 to’o agora sasan hotu la’o naksalak. Billaun $12 ita gasta laiha rezultadu”, tenik Alkatiri hafoin hasoru malu ho Xefe Governu iha Palásiu Governu, segunda ne’e.

Eis Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Ekonomia Espesiál Ekonomia Sosiál Merkadu (ZEESM) ne’e konsidera impase komplika situasaun rai-laran atu la’o ba oin.

“Ha’u hateten ona katak impase ne’e hanesan ita nia uat ida maka halo ran ne’e la’o laloos. Tuir saúde nian karik halo by pass. Ita iha korazen atu halo by pass ka lae? Se ita iha korazen atu halo, ita halo ba hodi rezolve problema”, nia dehan.

Tuir relatóriu Banku Mundiál ne’ebé fó sai iha tinan 2019, hateten Produtu Internu Bruto (PIB) Timor-Leste iha 2019 rekupera ba porsentu 3,9, hafoin tinan rua tutuir malu (2017 to’o 2018) monu tanba kauza hosi inserteza polítika.

Relatóriu ne’e esplika, PIB sa’e ba pursentu 3,9 tanba senáriu ida hosi estabilidade ekonomia no polítika ne’ebé avansu, liuliu tanba gastu públiku ne’ebé boot implika ba konsume privadu ne’ebé forte.

Jornalista: Antónia Gusmão

Editora: Julia Chatarina

INFORMASAUN

HAKEREK NO HATÁN

Please enter your comment!
Please enter your name here