DILI, 15 fevereiru 2020 (TATOLI) – Prezidente Autoridade Nasionál Petróleu no Minerál (ANPM), Gualdino da Silva, informa prosesu negosiasaun ba Greater Sunrise la’o hela iha nivel bilaterál no trilaterál no iha tinan ne’e (2020) finaliza ona konseitu ba dezenvolvimentu Greater Sunrise.
“Negosiasuan ita hala’o hela para tinan ida ne’e (2020) ita bele finaliza ona rejime regulamentu ne’ebé ita presiza no kontratu ne’ebé ita presiza para hahú ona simu dokumentu kona-ba konseitu dezenvolvimentu Greater Sunrise”, Prezidente ANPM ba Ajénsia TATOLI iha edifísiu Ministériu Finansa, sesta ne’e.
Hafoin Governu Timor-Leste (TL) no Austrália troka nota diplomátika kona-ba tratadu fronteira maritima no entra ein vigór iha 30 agostu 2019. Estadu Timor-Leste liuhosi ANPM hala’o negosiasaun ho Governu Austrália no kompañia sira hodi finaliza konseitu dezenvolvimentu Greater Sunrise (GS).
“Semana oin, ami enkontru tan iha Brisbane-Austrália ba negosiasaun iha nivel bilaterál (Timor-Leste ho Austrália) no nivel trilaterál (Timor-Leste, Austrália no empreza Joint Venture) inklui TIMOR GAP”, katak.
Hodi dehan kampu GS ne’e, Estadu Timor-Leste halo ona kontaktu ho Austrália no kompañia Joint Venture sira inklui TIMOR GAP atu dentru fulan neen nia laran iha tinan ne’e finaliza rejime kontratuál no fiskál úniku ba projetu GS.
Gualdino da Silva dehan ANPM mak lidera negosiasaun ne’e no partisipa direita mós husi TIMOR GAP nu’udar kontraktor atu prepara planu no finaliza ba konseitu dezenvolvimentu nasionál.
Estadu Timor-Leste no Austrália tenke hala’o negosiasaun duni hodi iha konkordánsia mak bele hala’o esplorasaun ba kampu Greater Sunrise tanba media line ne’ebé fahe fronteira, kampu ne’e balun tama iha área jurizdisaun Austrália.
Iha prosesu negosiasaun antes ne’e, Greater Sunrise dada mai Timor-Leste sei afavór porsentu 70 no Austrália hetan porsentu 30 no dada ba Austrália afavór porsentu 20 no ba Timor-Leste porsentu 80.
Antes ne’e, Negosiadór Prinsipál ba asuntu Fronteira Marítima, Xanana Gusmão husu ba públiku atu lalika dúvida ona tanba kadoras Greater Sunrise pozitivu ona dada mai iha Timor- Leste.
“Ha’u sente kontente tanba apezar de 20 anos de’it mós ita halo buat balun, rai barak ukun an kle’ur ona, ha’u bá vizita sira aat liu ita , ne’ebé ita sente katak di’ak no ita kontinua la’o neineik ho esforsu makaas ho vontade atu serbí labele lakon”, katak.
Jornalista : Florencio Miranda Ximenes
Editora : Maria Auxiliadora
oinsa ho situasaun Covid-19 nebee Timor Leste agora enfreta no relacional ho Greater sunrise