Xefe Kaza Sivíl, Francisco María de Vasconcelos, iha Aeroportu Internasionál Nicolau Lobato, atu dezloka ba Camberra, Austrália, ohin. Foto Mídia PR

DILI, 14 fevereiru 2020 (TATOLI)–Prezidente Repúblika (PR), Francisco Guterres Lú Olo, delega Xefe Kaza Sívil, Francisco Maria de Vasconcelos, bá partisipa serimónia fúnebre James Dunn, ne’ebé sei realiza iha 15 fevereiru 2020, iha Camberra, Austrália.

Tuir despaxu PR Lú Olo nian, Xefe Kaza Sivíl sei partisipa iha serimónia fúnebre James Dunn nian, hanesan Alta Individualidade no Portadór Mensájen, hodi reprezenta Prezidente Repúblika.

Komunikadu husi Prezidénsia Repúblika ne’ebé Agência Tatoli asesu, ohin, hateten partisipasaun Xefe Kaza Sivíl esprimi solidariedade ba falesimentu belun boot Timor-Leste nian no manifesta mós respeitu no admirasaun ba amizade ne’ebé dedika ba povu Timor-Leste.

James Dunn diplomata, ofisiál intelejénsia, tropa, peskizadór, autór no ativista direitu umanu. Iha nia kareira ne’ebé naruk, nia halo kampaña maka’as ba direitu auto-determinasaun Timor-Leste nian ba mundu internasionál.

James Dunn nia kontribuisaun ba Timor-Leste, hahú iha 1962-1964 bainhira nia asume knaar hanesan Konsul Austrália ba Timor-Portugéz. Knaar ne’ebé nia halo ikusmai dedika-an tomak ba kauza Timor-Leste nian.

Nia livru “Timor: A People Betrayed” hanesan rezultadu peskiza apuradu ida-ne’ebé ikusmai sai livru referénsia ba ema barak ne’ebé hakarak koñese esénsia husi kauza timorense.

Saudozu James Dunn hakotu is iha loron-31 janeiru 2020 iha Ospitál Calvary, Camberra ho idade 92.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here