iklan

NASIONÁL, INTERNASIONÁL, DILI, HEADLINE, KAPITÁL, SEGURANSA

TLPDP Konstrui Edifísiu Foun PNSIK Kompleta Ho Fasilidade Deteta Droga

TLPDP Konstrui Edifísiu Foun PNSIK Kompleta Ho Fasilidade Deteta Droga

CAPTION: Komandante Jerál PNTL, Komisáriu Polísia Faustino da Costa  akompaña husi husi Komandante TLPDP, Komisáriu  Geoff Tuner  lansa fatuk dahuluk ba edifísiu  SIKN iha Kuartél Jerál PNTL Caicoli Dili. Imajen/Eugénio Pereira

DILI, 14 fevereiru 2020 (TATOLI)-Governu Austrália liuhosi Komisáriu Timor-Leste Police Development Program (TLPDP), Geoff Tuner hamutuk ho Komandante Jerál Polisia Nasionál Timor-Leste (PNTL) Komisáriu  Faustino da Costa, sesta (14/02/2020), lansa ona fatuk dahuluk ba kontrusaun edifísiu foun Servisu Investigasaun Kriminál Nasionál (SIKN) kompleta ho ekipamentu hodi deteta droga.

Lansamentu fatuk-inan ne’e hetan bensaun hosi Padre Kapelaun PNTL, Nelino Américo, iha Kuartél Jerál Polisia Caicoli, Dili. Obra ne’e ezekuta hosi Kompañia Caltech Internasionál.

Notísia Relevante :PNTL-TLPDP Inaugura Uma Unidade Pesoál Vulneravel Munisípiu Dili

Komisáriu Geoff Tuner dehan, edifísiu ne’e sei sai nu’udar kooperasaun importante ida entre TLPDP ho Instituisaun PNTL nian liliu fasilita servisu polisia  iha unidade prevensaun krime.

Sentru foun ne’e sei konstrui kompleta ho fasilidade no abilidade forénsiku hodi halo identifikasaun ba aimoruk droga tanba sei uza sistema identifikasaun impresaun dijitál automátiku kompleta ho fasilidade seluk tan.

Notísia Relevante :TLPDP Kapasita VPU Kombate Krime Violénsia Doméstika

Nia hatutan, sei instala  mós komputadór no printer iha fatin resepsionísta ida ne’ebé própriu

Enkuantu, obra ne’e sei kontrui mós sala ba rai sasan apreensaun liliu ba droga, fatin detensaun, intervista, fatin forénsiku, fasilidade buska, eskritóriu no seluk tan.

Komandante TLPDP ne’e  espera hafoin konstrusaun ne’e remata, polisia sei uza edifísiu foun ho ninia ekipamentu ne’e hodi kontrola droga, tráfiku umanu, violasaun seksuál, esplorasaun ilegál no peska, brankamentu kapitál, krime sibernétika no fraude no grupu krime organizadu.

“Ida ne’e investimentu maioria husi Austrália no TLPDP, ha’u espera polisia sei uza tuir ninia kapasidade másimu atu halo servisu investigasaun nian,”dehan Komandante TLPDP Geoff Tuner, iha Caicoli Ohin.

Nune’e mós  nia rekomenda ba PNTL, atu kolabora no koordena liután ho Prokuradór Jerál Repúblika, Tribunál, Alfándega, Servisu Migrasaun, no Banku sira kontrola no prevene atividade grupu krime organizadu sira hodi apoiu dezenvolvimentu nasionál.

Iha fatin hanesan, Komisáriu PNTL,  Faustino da Costa  agradese ba apoiu tomak ne’ebé oferese hosi TLPDP tanba apoiu ona instituisaun ne’e komesa iha tinan 2000-2020.

“Ami agradese ba Governu Austrália no TLPDP hodi konstrui edifísiu ida ne’e importante tebes ba ami,” informa, Komisáriu PNTL.

Ho apoiu ne’e sei fasilita di’ak liután Komandu PNTL liliu SIKN sei halo servisu másimu ba kombate krime organizadu hanesan tráfiku droga no seluk tan.

Hatan kona-ba rekomendasaun Komandante TLPDP Geoff Tuner, atu reforsa servisu ho intituisaun seluk, Faustino da Costa afirma sei koordena ho Prokuradór Jerál Repúblika, Tribunál, Alfándega no Banku sira hodi realiza formasaun kona-ba prevensaun ba krime organizadu.

Ikusliu, Diretór SIKN Superintendente Xefe Polisia, la lembra montante orsamentu ba projetu  ne’e tanba responsaliza hosi parte TLPDP.

Entretantu, antes ne’e Timor-Leste Police Development Program (TLPDP) fó ona apoiu ba Polisia hodi estabelese ona Sentru Treinamentu ba Polisia iha Munisípiu no mos harii edifísiu seksaun unidade ema vulneravel ka Vulneravel Person Unit (VPU) iha Komandu PNTL Munisípiu Dili.

Jornalista : Eugénio Pereira

Editór       : Francisco Simões

iklan
iklan

Leave a Reply

iklan
error: Content is protected !!