Prezidente Autoridade Nasionál Petróleu no Minerál (ANPM), Gualdino da Silva. Imajen /Antonio G

DILI, 14 fevereiru 2020 (TATOLI) – Prezidente Autoridade Petróleu no Minerál (ANPM), Gualdino da Silva, informa Timor-Leste (TL) hetan vantajen bainhira empreza Baron Oil deside hasa’e ka aumenta nia asaun ba porsentu 400 iha posu chuditch-1 iha tasi Timór.

“Konforme publikasaun sira dehan aumenta asaun 400% iha semana ida nia laran, ne’e fó benefísiu tanba eleva ita-nia kontratu ba projetu iha tasi Timór iha nivel Estadu Londres ka nivel mundiál nian”, Prezidente ANPM ba Ajénsia TATOLI iha edifísiu Ministériu Finansa, Aitarak-Laran, ohin.

Nune’e, Gualdino dehan aumenta asaun ne’e: “Iha benefísiu rua ba ita, dahuluk, eleva ita-nia kontratu ne’e ba tiha mundiál tanba iha Londres ne’e sentru mundu nian, daruak, ita iha vantajen boot liu tanba sira bele halibur osan para halo sira-nia atividade ne’ebé mak tau tiha ona iha sira-nia kontratu”, katak.

Hodi hatete asaun petrolífera Baron Oil husi Reinu Unidu ka Londres ne’e aumenta ba porsentu 400 hafoin empreza Shell husi Austrália divulga relatóriu katak posu Chuditch-1 potensiál ba ezistente koluna metru 25 ba gás ho estimasaun pés kúbiku gás millaun 2.320.

Iha novembru 2019, ANPM reprezenta Estadu Timor-Leste (TL) asina tiha ona Kontratu Produsaun (KFP) TL-SO-19-16 ho Fahe SundaGas Banda Unipessoal, Lda (SundaGas) no TIMOR GAP Chuditch Unipessoal, Lda.

Kontratu fahe produsaun ne’e, TIMOR GAP Chuditch nia partisipasaun iha porsentu 25 no SundaGas iha porsentu 75, kompañia ne’ebé na’in husi Inglaterra no rejista ona iha Timor- Leste no nia baze iha Singapura.

Sobre empreza nia programa traballu iha tinan rua dahuluk, hahú husi agora to’o tinan rua mai, sei finaliza estudu, prosesa fali dadus sízmiku ne’ebé mak iha área kontratu laran.

Gualdino afirma, iha investimentu husi kompañia ne’e ba tinan rua (períodu dahuluk), sei investe osan pur volta millaun $1 no ba tinan datoluk atu halo perfurasaun mak gasta entre millaun $15 to’o $20, maibé Estadu no TIMOR GAP la tau osan.

Kontratu ne’ebé asina mak kampu gás ho naran Chuditch ne’ebé iha tasi-laran, uluk iha área konjunta nian, depois tratadu tama iha vigór, área ne’e 100% Timor-Leste nian. Ba bloku ka área ida ne’e mak TL-SO-19-16 (Timor Leste-South Offshore-19 (tinan 2019)-16 (númeru bloku nian).

Nia subliña área kontratu ne’e provada tiha ona katak iha gás, deskobre ona iha pasadu. “Purvolta 0.7 TCF (trillion cubic feet) gás. Agora, ita hetan perfurasaun ba estrutura ida ne’ebé iha kontratu área hanesan ne’ebé fó tan ita gás ruma para bele lori to’o 1.2 ka 1.3 TCF hanesan ne’e bele dezenvolve mesak ona”, katak.

TL-SO-19-16, lokaliza iha área súl husi eis área konjunta (JPDA), ho totál área 3571.49 kilómetru kuadradu.

SundaGas ho TIMOR GAP iha kompromisu atu halo programa peskiza ba períodu tinan hitu.

Rekizitu mínimu sira ba programa peskiza iha inísiu tinan 1-3 inklui re prosesa sízmiku (Pre-Stack Depth Migration) husi 800 km² husi dadus sízmiku 3D no liña kilómetru 2000 husi dadus sízmiku 2D, no halo revizaun ba potensiál idrokarbonu iha área kontratu tomak (estudu kona-ba geological no geophysical) no halo perfurasaun ba mina-matan ida.

Se rezultadu husi prosesamentu dadus sízmiku suporta, signifika husi estrutura ne’e asosiadu ho deskoberta Chuditch. Períodu daruak (tinan 4-5) inklui post estudu avaliasaun ba mina-matan no halo perfurasaun ba mina-matan ida, posu esplorasaun no planu senáriu dezenvolvimentu ba deskobre Chuditch.

Períodu datoluk (tinan 6- 7) inklui estudu geological no geophysical no halo perfurasaun ba mina-matan rua.

Iha ámbitu asina kontratu ne’e, Diretór Ezekutivu (CEO) SundaGas, Andy Butler, hatete kontente tebes hodi asina KFP Chuditch ho ANMP ho mós ajuda no suporta husi parseiru, TIMOR GAP.

“Ami-nia prioridade dahuluk mak hadi’ak ami-nia komprensaun kle’an kona-ba signifikante rekursu Gas Chuditch no identifika lokál loloos husi posu dahuluk. Ami sei halo ida ne’e paralelu ho prospetu seluk ne’ebé maduru ona hodi tau hamutuk portfolio perfurasaun kompleta ida”.

Hodi hatutan, ne’e hanesan milestone importante ida ba SundaGas no bá oin hakarak halo progresu teknikamente no komersialmente hodi asegura dezenvolvimentu tuir tempu husi rekursu sira ne’ebé deskobre no sira ne’ebé seidauk deskobre ba benefísiu Timor-Leste nian.

Notísia relevante : TL Asina Kontratu Fahe Produsaun ho SundaGas no TIMOR GAP Chuditch

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here