Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 14 fevereiru 2020 (TATOLI)–Tuir planu, iha loron 20-21 fevereiru, Prezidente Repúblika (PR), Francisco Guterres Lú Olo, sei simu karta kredensiál husi nasaun sia ne’ebé sei entrega direta husi embaixadór naun rezidente sira. 

Ministru Negósiu Estranjeiru no Kooperasaun, Dionísio da Costa Babo Soares, hato’o asuntu ne’e, hafoin audiénsia ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“Ohin enkontru ho Prezidente Repúblika, relata katak iha semana oin sei iha aprezentasaun kredensiál husi embaixadór na’in-sia, naun rezidentes ne’ebé sei hola parte iha-ne’e. Kredensiál sira-ne’e atu dehan katak sira mak sai nu’udár embaixadór mai ita-nia rain”, Dionísio Babo esplika.

Entretantu, ajenda ne’ebé TATOLI asesu husi Prezidénsia Repúblika, katak, serimónia entrega karta kredénsiál husi embaixadór sira ba Prezidente Francisco Lú Olo, sei hala’o iha loron-rua nia laran. Iha 20 fevereiru, Xefe Estadu sei simu karta kredensiál husi Embaixadór Repúblika Populár Ukránia, Embaixadór Olexander Nechytaylo, Fransa, Embaixadór Oliver Chambard, Repúblika Turkia, Embaixadór Mahmut Kiliç, Repúblika Izlámika Irán, Embaixadór Muhammad Azad, Repúblika Árabe Ezitu, Embaixadór Ashraf Sultan, Repúblika Bulgaria, Embaixadór Peter Andonov.

Aleinde ne’e, iha 21 fevereiru, Prezidente Repúblika sei kontinua simu karta kredensiál husi Repúblika Suésia, Embaixadora Maria Berg, Repúblika Chile, Embaixadór Gustavo Ossandon, Reinu Olanda, Embaixadór Lambertus Grijns.

Entretantu, bazeia ba artigu 13 versíkulu 1 Konvensaun Viena tinan 1961, reprezentante diplomátiku ka embaixadór konsidera hala’o ona nia knaar iha nasaun resetór, bainhira nia entrega ona karta kredensiál ba Xefe Estadu ka Xefe Governu nasaun resetór.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here