Estatua místiku Atauru. Foto TATOLI: Tomé Amado

DILI, 14 fevereiru 2020 (TATOLI)-Organizasaun Naun Governamentál (ONG) Timor Aid no Sekretaria Estadu Arte no Kultura (SEAK) sei aprezenta espozisaun Eskultura Ataúro nian iha Arkivu &Muzeu Rezisténsia Timorense (AMRT), Dili hosi loron 14, fulan-Fevereiru to’o loron 13, fulan-April 2020.

Espozisaun ne’e sei loke ba públiku hosi loron tersa to’o sábadu, iha tuku 10 dadeer to’o tuku 5 lorokraik.

Serimónia lansamentu ba espozisaun ne’e sei hala’o iha AMRT, loron 14, fulan-Fevereiru 2020, tuku 5:30 lokraik to’o tuku 7 kalan.

Laureadu Nobel da Paz, Dr. José Ramos-Horta sei marka prezensa iha AMRT orsida lokraik, hodi loke ezposizasaun ida-nee.

Espozisaun ida-ne’e nu’udar edisaun ba daruak nian, ne’ebé hala’o hosi Timor-Aid. Edisaun ba dahuluk hala’o ona iha Galeria Arte, Universidade Charles Darwin, Darwin, Australia hosi fulan-Marsu to’o fulan-Juñu 2017.

“Universidade Charles Darwin sente haksolok tebes ho Timor Aid nia espozisaun Eskultura Ataúro nian ba daruak ida-ne’e, hafoin tuir kedas ho espozisaun dahuluk nian ne’ebé hala’o ho susesu iha Galeria Arte Universidade Charles Darwin nian iha tinan 2017,” Kellie Joswiq, Kuradora ba Galeria Arte no Kolesaun Arte Universidade Charles Darwin nian hatete.

“Espozisaun ida-ne’e hatudu mai ita hotu katak uluk kedas ita-nia bei-ala sira iha ona matenek ne’ebé klean kona-ba arte. Husu boot Timoroan sira hotu, liuliu jerasaun foun sira atu bele banati tuir no hatutan nafatin riku soi sira-ne’e iha futuru.”, Cecilia Assis, Diretora Nasionál ba Arte, Sekretaria Estadu ba Arte no Kultura haklaken nia hanoin.

(*/KI)

HAKEREK NO HATÁN

Please enter your comment!
Please enter your name here