MNEK Presta Omenajen ba Saudozu James Stanley Dunn. Imajen: Nelia Borges

DILI, 14 fevereiru 2020 (TATOLI)– Governu Timor-Leste (TL) liuhosi Ministériu Negósiu Estranjeiru no Kooperasaun (MNEK) realiza serimónia homenajen “In Memoriam” ba Saudozu James Stanley Dunn, Eis-Konsuladu Austrália mai TL ne’ebé hakotu iis iha loron 1 fulan fevereiru 2020.

Ministru Negósiu Estranjeiru no Kooperasaun, Dionísio Babo Soares informa  valór  ida ohin ne’e halo hodi hanoin hikas fali James Dunn ne’ebé nu’udar Australianu dahuluk sai Timór nia lian uainhira invazaun mosu.

“Uainhira invazaun mosu iha mundu, Austrália apoiu invazaun, nia sai hanesan figura permanente ida ba vóz ita Timór nian no nia rasik maka hakerek livru ida hanaran A people batrayed,” Ministro Dionísio Babo informa ba jornalista sira hafoin ramata fó homenajen ba matebian James Dunn iha edifísiu MNEK, Praia dos Coquiros, Dili, ohin.

Diplomata timoroan ne’e reforsa, James Dunn nu’udar Australianu ne’ebé lori Timór nia funu ba iha rai-li’ur. “anba ne’e susar ba ita atu haluhan tiha sira iha ita-nia istória internasional”.

Iha biban hanesan, Ministru Dionísio realsa James Duun hanesan mós ema onoráriu ida iha tempu portugés no nia livru kaptura atensaun mundu nian.

“Nia livru koalia kona-ba luta Tim’or nian, violasaun direitu humanu, nune’e livru ne’e kaptura atensaun no halo mosu rezolusaun barak iha Nasaun Unida alende diplomásia husi Dr.Horta (Ramos Horta)”.

“Iha altura ne’ebá James hanorin buat barak ba Dr.Horta liuliu kona-ba oinsá halo politíka rejionál no mundiál bele akapta opiniaun no atensaun internasionál hodi bele apoiu ita-nia kazu,” diplomata timoroan ne’e haktuir.

Governante ne’e reforsa: “Sem kontribuisaun James nian Timor-Leste sei la sai nasaun demokrátiku hanesan daudaun ne’e”.

Entretantu Serimónia refere marka prezensa hosi Eis-Prezidente Repúblika, José Ramos Horta, membru governu balun no entidade timoroan sira balun tan.

Notísia relevante:PN Aprova Votu Pezár ba James Dunn

Jornalista: Nelia Borges

Editór     : Rafy Belo

HAKEREK NO HATÁN

Please enter your comment!
Please enter your name here