Diretór Divizaun Investigasaun Jeolojia IPG, Elias da Silva Cabral. Imajen/Florencio..

DILI, 14 fevereiru 2020 (TATOLI) – Diretór Investigativu Jeolojia Institutu Petróleu no Jeolojia (IPG, sigla portugés), Elias da Silva Cabral, informa haruka tiha ona amostra module Amplified Geochemical Imaging (AGI) hamutuk 185 hodi bá analiza iha laboratóriu Newark Delaware Estadu Unidu Amérika (EUA).

“Ami haruka ona amostra module AGI 185 ba peskiza mina no gás iha munisípiu Baucau no Viqueque, iha kuarta ne’e (12/02) bá analiza  iha Newark Delaware Estadu Unidu Amérika hafoin halo kolaborasaun no autoriza husi Alfándega, Kuarentena no Aviasaun Sivíl”,  Diretór IPG afirma ba TATOLI, iha salaun edifísiu Ministériu Finansa, Aitarak-Laran, ohin.

Amostra module AGI ne’e sei liu husi Bali-Indonézia bá Singapura no to’o iha Amérika iha segunda semana oin.

Sobre kustu analiza, Diretór Elias Cabral dehan iha negosiasaun ho laboratóriu Newark Delaware USA katak osan rihun $260 ne’e mak sosa ekipamentu module AGI ne’ebé inklui ona ba prosesu analiza dadus iha laboratóriu ne’e.

Hodi dehan IPG hakarak rezultadu analiza ne’e hotu iha abríl atu iha maiu bele halo prosesamentu ba data hodi juñu bele fó sai ona rezultadu ba peskiza mina no gás nian.

“Ita haree karik rezultadu pozitivu, ami sei kontinua halo estudu kle’an ho métodu grau jeofíziku atu hatene modelu mina ho kle’an inklui área luan ne’e”, katak.

Module AGI ne’e kolleita iha 4 to’o 21 janeiru 2020, hanesan husi bloku A ne’ebé kompostu husi Postu Administrativu Venilale, Ossu-Viqueque, Vemasse ho totál module ne’ebé instala hamutuk 36, bloku B kompostu husi Postu Administrativu Watulari, Quelicai, Baucau ne’e ekipa IPG instala module 73 no bloku C ho lokalidade Laga no Baguia ho totál module 32, maibé module ida mak nehek estraga.

Atividade seluk maka ekipa halo mós instalasaun module ba posu abandona rua iha Alianbata iha module 22, posu Betano iha 22 no kondisaun di’ak hotu.

Durante peskiza ba atividade iha terrenu hahú husi prosesu instalasaun loron 21 no rekolla fali iha loron 21 ne’ebé ho totál kompletu loron 42.

Atividade peskiza ho ekipamentu AGI hahú instalasaun iha (13/12/2019) ho nia objetivu atu hatene ezisténsia idrokarbonetu iha rai okos, atividade kalibrasaun ba posu abandona no amostra mina no gás.

IPG halo peskiza mina no gás utiliza ekipamentu ou teknolojia modernu ho naran AGI hodi identifika ezisténsia mina no gás iha munisípiu Baucau no Viqueque. Ekipamentu AGI nu’udar teknolojia moderna ne’ebé utiliza ba esplorasaun jeokímika hodi identifika gás no mina, liuhusi migrasaun microseepage, indika ho kímika analítika husi C2 to’o C20 iha fatuk jeradór ou fatuk rezervatóriu.

Estudu ne’e nu’udar kontinuasaun ba estudu sistema petróleu ne’ebé hala’o iha área refere iha 2016 to’o 2017 no hatudu rezultadu ne’ebé di’ak ba konsentrasaun petróleu no gás.

Notísia relevante : IPG sei Haruka Amostra Module AGI 185 ba Analiza iha Laboratóriu EUA

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here