Familia Balun iha Aldeia 17 de outobru Suku Metiaut, Postu Administrativu Cristo-Rei suru rai hodi fakar ba estrada laran.Imajen/Osoria Marques

DILI, 14 fevereiru 2020 (TATOLI)-Eis Prezidente Repúblika, José Ramos Horta, iha ninia pájina Facebook, preokupa ho Família balun iha Suku Metiaut tanba uja ekipamentu pezada hodi kee rai hodi harii uma depois fakar fali iha estrada laran hodi afeita ba komunidade iha tempu udan.

“Ami ema Metiaut halerik, terus tan ema na’in-ida  maibé ami lahatene nia ne’e sé, lalin rai fakar iha estrada no tasi ibun, nia mákina aat mós soe de’it iha fatin ne’e udan mai lori bee taka kanu bee nian hodi taka estrada,”preokupa Horta iha ninia publikasaun Facebook ne’ebé TATOLI, asesu ohin.

Komunidade Suku Metiaut Isabel dias Sarmento. Imajen /Osoria Marques

Premiadu Nobel ba Dame ne’e hatutan atetude família ne’e konsege estraga infraestrura estrada públiku ne’ebé maka governu konstrõe ona iha fatin ne’ebá.

Tanba ne’e, Horta husu ba Ministériu Obra Públika (MOP)ho Autoridade Munisípiu Dili nian atu haree orijente ba kestaun ne’e  tanba afeita ba komunidade sira iha Metiaut.

Preokupasaun hanesan hato’o mós hosi Komunidade Aldeia 17 de outobru Suku Metiaut Postu Administrativu Cristo-Rei Munisípiu Dili, Isabel dias Sarmento, katak kazu ne’e akontese ona iha inisíu fulan-fevereiru liubá tanba ne’e,  bainhira udan lori rai no tahu tama hotu ba komunidade nia-uma.

“Ha’u sente triste ho komunidade sira ne’ebé mak uza eskavador  privadu hodi kee rai no taka tiha bee dalan ka mota. Nune’e bainhira udan bee labele la’o tuir mota maibé bee lori tahu dodok no rai henek taka dalan no estrada públiku,” dehan, Isabel Dias, ohin ba Agência TATOLI, iha Metiaut Dili, ohin.

Entretantu, to’o notísia ne’e públika, Jornalista TATOLI la konsege konfirma asuntu ne’e, ho família ne’ebé deskonfia suru rai hodi fakar ba estrada laran.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here