DILI, 14 fevereiru 2020 (TATOLI)–Eis Prezidente Repúblika no Premiadu Nobel ba Pás, José Manuel Ramos Horta, iha opssun tolu atubele hakotu impase polítika ne’ebé oras ne’e daudaun iha.
Horta hato’o opsaun tolu ne’e, hafoin hasoru-malu ho Prezidente Repúblka (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.
“Opsaun maka ne’e, Aliansa Mudansa ba Progresu (AMP) kontinua re-organiza, re-estrutura, konforme sira. Maibé, parese Primeiru-Ministru Taur Matan Ruak (TMR) la interesadu. Solusaun seluk, FRETILIN bele lidera koligasaun foun ida, aprezenta ba Prezidente Repúblika no CNRT bele lidera koligasaun ida entrega ba Prezidente Repúblika”, Premiadu Nobel ba Pás hato’o opsaun tolu ne’e ba mídia, hafoin enkontru ho Xefe Estadu.
Horta mós dehan katak opsaun rua ne’e tenke garante maioria absoluta nune’e buat ne’e bele la’o bá-oin.
Aleinde ne’e, husi opsaun rua ne’e, maka ida aprovada, depois Prezidente Repúblika hakarak, no ema hotu hakarak, tenke iha paktu nasionál ida-ne’ebé ema hotu simu atubele garante Governu foun ne’e pelumenus serbisu di’ak to’o tinan 2023.
Antes ne’e, iha reuniaun entre líder nasionál sira ho Prezidente Repúblika, hamosu konkordánsia tolu maka hanesan, primeiru, Eleisaun Antesipada (EA) nu’udar rekursu ikusliu. Segundu, partidu polítiku sira maka iha asentu Parlamentár, sira hotu tenke halo movimentu polítiku oinsá maka bele dezeña sira-nia opiniaun, sira-nia hakarak, atubele hetan solusaun ba impase polítika ida-ne’e. Terseiru, Primeiru-Ministru, Taur Matan Ruak sei mantein hanesan Primeiru-Ministru ba VIII Governu Konstitusionál to’o hetan solusaun ba situasaun polítika rai-laran.
Jornalista: Cipriano Colo
Editór: Xisto Freitas
inportante tau interese ba povo no nasaun.