Eis Prezidente Repúblika, José Manuel Ramos Horta. Imajen/Egas Cristovão

DILI, 14 fevereiru 2020 (TATOLI)–Premiadu Nobel ba Pás, José Manuel Ramos Horta konsulta ona ho líder sira, inklui hasoru ona Kay Rala Xanana Gusmão maibé seidauk iha konkluzaun atu solusiona impase polítika. 

“Tuir ami-nia reuniaun ho Prezidente Repúblika iha loron 10 fevereiru, ha’u ajuda halo kontaktu, rona malu, atu bele hetan ideia, hodi solusiona krize ne’e. Ohin, Prezidente Repúblika ho nia laran luak tebes, fó tan tempu atubele simu tan ha’u dala ida tan. Foin lalais, ha’u hasoru malu ho Kay Rala Xanana Gusmão, horisehik ha’u ko’alia mós ho Primeiru-Ministru, Taur Matan Ruak, esforsu kontinua nafatin, hanesan ita-boot sira hatene katak Prezidente Repúblika entrega ba partidu polítiku sira no partidu polítiku sira mak tenke lori mai Prezidente Repúblika kona-ba solusaun saida mak tenke halo. Siginifika, Governu ho nia mekanizmu, alternativu saida mak tenke halo atubele bá-oin, liuliu iha fulan ida-ne’e ka fulan marsu bá-oin, se ida-ne’e mak laiha, opsaun seluk bele ba Eleisaun Antesipada (EA)”, Horta esplika ba mídia hafoin enkontru ho Xefe Estadu iha Palásiu Prezidente Nicolau Lobato, Bairru Pité, Dili, ohin.

Nia informa mós katak reuniaun entre líder nasionál sira ho Xefe Estadu iha loron 10 fevereiru, EA la’ós primeira eskolla, di’akliu partidu polítiku sira mak hatudu sira-nia matenek atubele hetan solusaun.

“Ha’u rasik kontinua esforsu hodi ko’alia ho kolega sira, fera ulun ho umildade, ho matenek, ho pasiénsia, atubele hetan solusaun ida-ne’ebé di’ak”, Horta hateten.

Premiadu Nobel ba Pás ne’e mós rekoñese katak Kay Rala Xanana Gusmão oras ne’e daudaun serbisu barak, no Horta fiar katak oras ne’e Xanana halo daudaun konsulta iha partidu CNRT ho partidu polítiku sira seluk, atu buka solusaun tanba Xanana mós iha preokupasaun ba estabilidade ho futuru rai ida-ne’e.

“Xanana kontinua luta prosesu negosiasaun ne’ebé todan tebe-tebes ba Fronteira Terrestre no Fronteira Marítima entre Indonézia no tasi mane, hanesan Xanana rasik esplika ba ha’u kona-ba prosesu ne’e la’o oinsa, la’ós halimar tanba difísil. Tanba Xanana la’ós kaer de’it kona-ba problema partidu nian ho Governu, maibé nia haree buat ne’ebé boot liu, interese nasionál. Maibé, bainhira iha tempu, Xanana mós iha obrigasaun atu halo diálogu iha partidu CNRT no partidu sira seluk atu hetan rezultadu ruma hodi aprezenta ba Prezidente Repúblika. Bainhira laiha solusaun ida-ne’ebé di’ak, ha’u hanoin tenke ba duni Eleisaun Antesipada”, Horta subliña.

Durante hanesan mediadór, Horta mós hasoru-malu ona ho Primeiru-Ministru, Taur Matan Ruak, atu hato’o preokupasaun, rona Primeiru-Ministru kona-ba pozisaun PLP nian.

“Tanba ita rona iha mídia dehan katak Partidu Libartasaun Populár (PLP) ho koligasaun Aliansa Mudansa ba Progressu (AMP) laiha ona, maibé Primeiru-Ministru hatudu ninia sentidu atu kontinua garante funsionamentu Governu, atu labele iha paralizasaun ba buat hotu. Ne’e mak ami ko’alia ho Primeiru-Ministru ho sentidu Estadu, nia mós hakarak kontribui atu hetan solusaun. Ne’e mak ami ko’alia no seidauk iha konkluzaun ruma, atubele fahe ba ita-boot sira”, Horta haklaken.

Eis prezidente Repúblika ne’e mós konfia nafatin líder sira, hanesan Kay Rala Xanana Gusmão, katak, nia iha kbiit atu hetan solusaun bá-oin no Xanana rasik hateten tiha ona iha televizaun katak kondisaun ida-ne’ebé importante tebe-tebes tanba kondisuan dignidade ema nian, dignidade partidu, pose membru Governu CNRT na’in-sia mak hahú hanesan abut ba problema, laiha tan abut seluk, tanba ne’e Horta sujere nafatin tenke buka atu rezolve abut ida ne’e.

“Tanba ne’e, diálogu tenke kontinua nune’e Prezidente Repúblika bele sente kamaan no CNRT mós bele sente katak, ok, problema ne’e rezolvidu”, nia afirma.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here