Diretór Jerál Arte no Kultura, Manuel Ximenes Smith. Imajen: Nelia Fernandes

DILI, 11 fevereiru 2020 (TATOLI)–Governu Timor-Leste liuhusi Sekretária Estadu Arte no Kultura (SEAK) halo ona konkordansia hodi hodi hili uma-lisan tolu antigu liu iha Dili atu lia-na’in sira prepara aan hodi partisipa iha serimónia abertura jogu CPLP iha jullu tinan ida-ne’e ho sira-nia dadolin.

Diretór Jéral Arte no Kultura, Manuel Smith Ximenes, hateten tanba jogu CPLP ne’e realiza iha Dili entaun sira-hili Uma-Lisan Biru Manu Mata-Bidau, Uma-Lisan Rumbia-Kaikoli no Uma-Lisan Leobesi Karketu Mota Ain mak hetan fiar atu loke serimónia refere.

“Identifikassun uma lisan tolu iha Dili ho lia-na’in sira ne’e hetan ona konkordansia liuhusi sorumutu daruak entre liña ministeriais. Bainhira jogu CPLP ne’e atu halo, loke ho lia-na’in sira husi uma-lisan tolu ne’e mak sei hamulak hodi husu iis no beran atu atividade ne’e bele la’o.ho di’ak to’o nia rohan,” dehan Manuel Smith Ximenes ba Ajênsia TATOLI iha Edifisiu Sekretária Estadu Juventude no Desportu (SEJD), tersa (11/2/2020).

Nia infroma, aktividade seluk ne’ebé SEAK prepara ona mak espozisaun objetu muzeu ne’e sei konklui ho objetu etnográfiku, fotográfia no livru sira ne’ebé mak produs husi SEAK rasik, no atividade interkambiu kulturál.

“Ita presiza halo interkambiu kulturál entre ema CPLP ho kultura rai laran rasik. Benefisiu husi interkambiu ne’e mak parte rua entre TL no nasaun bainaka sira bele komprende liután ema seluk nia kultura,” nia dehan.

Tamba ne’e, nia hatutan, iha kalan kulturál ne’ebé sei realiza iha Centro Convençõens de Dili (CCD)  ne’e bainaka sira husi CPLP hetan oportunidade atu aprezenta sira-nia kultura.

Orsamentu ba hirak ne’e, nia hatán, SEAK rasik seidauk iha estimasaun kona-ba fundu hira mak sei prevee maibé iha enkontru daruak ne’e mak foin ko’alia kona-ba preparasaun saida mak iha ona atu hatán ba eventu ne’e no sei aprezenta ninia kustu.

Notísia Relevante: SEAK Identifika Ona Sangar Haat Partisipa Iha Eventu Jogu CPLP

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here