Sekretáriu Estadu Ambiente (SEA), Demétrio do Amaral de Carvalho, halo lansamentu ba Projetu Green Climate Fund Readiness Project (GCF) no Access and Benefit Sharing Project iha gabinete SEA, Sesta (14/02/2020). Imajen/Tatoli Egas Cristovão.

DILI, 14 fevereiru 2020 (TATOLI) – Governu Timor-Leste liuhosi Sekretáriu Estadu Ambiente (SEA) hetan projetu ida liuhosi kooperasaun ho Global Environmental Facility (GEF) ho títulu “Establishing the National Framework and Operational Capacity for Implementing the Nagoya Protocol in Timor-Leste”.

SEA Demétrio do Amaral de Carvalho hateten Protokolu Nagoya maka protokolu importante ida hosi implementasaun konvensaun Biodiversidade ninian, hodi proteje direitu sira kona-ba rekursu jenétika importante sira.

Protokolu ida ne’e, dezenvolve iha Nagoya-Japaun durante konferénsia da-10 husi parte hotu-hotu ba Konvensaun UNO ba Biodiversidade no objetivu hosi Protokolu ne’e mak atu regula asesu uzu sustentabilidade rekursu jenétiku nasaun nian (ai-horis, animál no mikro-organizmu sira) atu garante katak benefísiu mai hosi utilizasaun (liuhosi peskiza no dezenvolvimentu) fahe ba nasaun ne’ebé fornese ninia rekursu jenétiku ho justu.

“Iha Timor-Leste presiza duni reforsa ninia framework ba implementasaun protokolu ida ne’e, atu Timor-Leste bele hetan benefísiu hosi rekursu jenétika sira ne’ebé karik identifika iha Timor-Leste no aban-bainrua iha prospetór ruma hola atu dezenvolve ba peskiza no mós ba indústria, nune’e Timor-Leste bele iha nafatin direitu ba ida ne’e”, Demetrio afirma iha konferénsia ba imprensa iha salaun SEA, Mandarin, ohin.

Governante ne’e dehan projetu ne’e relasiona ba istória kafé “Hibrido de Timor” ne’ebé mosu hosi kruzamentu entre kafé robusta no arábika, ne’ebé nia kromosomu ne’e diferente ho kafé inan rua ne’e hodi hamosu kafé íbridu Timor-Leste nian.

Bainhira iha 1860 , pesti (Hemilea Vastratrix) ida ataka kafé iha mundu tomak hahú hosi Sri Lanka, ba Indonézia (1876) to’o Brazíl, hosi pesti ne’e halo produsaun kafé menus, no tinan sira ne’ebá mundu depende ba atividade komérsiu, indústria hanesan ohin loron mundu hotu depende ba atividade komérsiu matéria prima sira hosi agrikultura, entaun kafé hanesan primadona ida iha tempu ne’ebá, ne’ebé nasaun boot sira hanesan Brazíl, Portugál tanba kaer kolónia lubuk ida hanesan Angola ne’ebé prodús mós kafé sira kuaze atu lakon fonte rendimentu tanba ameasa hosi pesti ida ne’e.

Notísia relevante : Híbrido de Timor Selebra Tinan 90

“Entaun tempu ne’ebá peskizadór sira dezenvolve íbridu foun, ne’ebé mai foti hosi Timór, hodi kuda fali kafé ne’e iha fatin barak, maibé ita la hetan buat ida hosi íbridu orijinál Timór nian tanba iha tempu ne’ebá Protokolu Nagoya seidauk adopta hanesan framework ida atu proteje direitu sira ne’e maka ita labele reklama”, nia salienta.

Tanba ne’e maka SEA dehan Timor-Leste presiza duni Protokolu Nagoya hanesan instrumentu ida atu tulun Timor-Leste hodi proteje direitu sira ba espésie foun ruma ka espésie sira ne’ebé aban bainrua ho kapasidade dezenvolvimentu teknolojia rai-laran nian, se dezenvolve, ezemplu, produsaun ai-han ne’ebé aguenta ba mudansa klimátika ne’ebé mosu iha país, entaun ho protokolu ida ne’e bele proteje Timór nia direitu.

Liuhusi projetu ne’e, hetan apoia fundu hosi GEF ho montante millaun $1,3 hodi bele hahú implementa atu dezenvolve Timor-Leste nia framework hodi estabelese dalan di’ak liu rekursu jenétiku sira iha Timor-Leste. Apoia mós orsamentu hosi Fundu Klimátika Verde ou Green Climate Fund (GCF), fundu ida ne’ebé promove hosi GCF hodi nasaun sira eleva nia kapasidade para labele asesu ba fundu eskala médiu no boot ninian.

“Timor-Leste iha tinan dahuluk ba GCF menus hosi rihun $400. Iha informasaun importante ida maka iha tinan ida ne’e hanesan faze dahuluk SEA hetan fundu klimátika verde ida signifikadu tebes no iha tinan dahuluk ne’e Timor-Leste hetan fundu GCF Readness ho valór $695,038.00. Ho apoia fundu rua ne’e besik millaun $2, ami hanoin katak bele tulun atividade ami-nian balu iha biban sira ne’ebé karik dezafiante”, afirma.

SEA espera katak ezekusaun projetu ne’e la’o ho di’ak no iha duni framework nasionál ida hodi bele proteje no mínimu iha dokumentu ruma kona-ba Timor-Leste nia espésie exelente ruma no mós mekanizmu ruma atu proteje ba rikusoin jenétiku sira no bele dezenvolve polítika alterasaun klimátika.

Projetu ne’e hahú iha 2020 no daudaun ne’e diresaun nasionál rua iha SEA sei dirije mak Biodiversidade no Diresaun Jerál ambiente ho totál orsamentu $3,250,000 (husi GEF $1,319,863 no restu mai hosi in-kind contribution hosi parseiru implementadór hanesan SEA, CCCB/UNTL, MAF, CI no seluk tan) no diresaun rua ne’e hahú ona halo rekrutamentu ba ekipa sira reforsa jestaun ba projetu.

Preparasaun ba projetu ida ne’e komesa hosi fevereiru to’o jullu 2018 no karta konkordánsia kooperasaun projetu UNEP no Governu TL asina tiha ona iha agostu 2019. Projetu ida ne’e hahú iha marsu 2020 no tuir planu sei remata iha dezembru 2022, ne’ebé iha tempu maizumenus tinan tolu atu implementa.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here