DILI, 14 fevereiru 2019 (TATOLI)-Estudante Sentru Juventude Becora (SJB) komemora loron domin ka loron Santu Valentino (Valentine day) ho konsertu múzika, hodi fó hanoin ba malu, oinsá koko atu organiza atividade ida.

“Ami-na’in hira hakarak koko ami-nia a’an maske ami ki’ik ami bele realiza atividade ne’e,” Xefe Komisaun Organizadora, Ronaldo Dias Do Rego ba Agência TATOLI iha Sede Suco Becora, Dili, ohin.

Nune’e, tuir nia, objetivu ba atividade ida ne’e ho tema “Domin La’ós ba Ema-Na’in Rua De’it Maibé ba Ema Hotu”. “Objetivu lolos ba atividade ida ne’e atu ba ema hothotu bele sente loron domin ne’e, atu labarik, ferik, katuas, atu joven atu ema hotu bele sente, la’ós dehan ba ema ne’ebé iha namoradu de’it nia mak sente loron domin de’it”.

Ba loron ohin, Xefe Komisaun Organizadora, Ronaldo Dias do Rego sente kontente loos, liliu hanesan ohin realiza ona atividade ne’e, signifika la’os hatudu de’it ami-nia domin ba ema na’in ida ka na’in rua maibé, hatudu ami-nia domin ba ema hotu.

“Ami halo sira kontente ba loron ohin, hanesan ona ami hatudu ami-nia domin ba sira, ida ne’e ami kontente nu’udar joven ami na’in hira bele realiza atividade ida ne’e, atu ba ema ruma ne’ebé hetan hela presaun ruma iha familia iha fatin ne’ebé, sira bele mai iha fatin refere ami-nia atividade ne’e sira bele sente kontente, ida ne’e ami-na’in hira sente kontente los,” nia subliña.

Iha parte seluk, estudante SJB, Olimpia Cruz da Costa, hateten Valentine day, hanesan loron ne’ebé espesiál ba ema hotu, la’ós ba feto ho mane ne’ebé iha domin.

Estudante SJB, Olimpia Cruz da Costa

“Loron ida ohin, loron ida ne’ebé espesiál tebes ba ita hotu. Kona-ba loron domin nian, dehan katak loron domin ni’an refere ba ita feto no mane mak iha domin maibé domin ne’e sempre ba ema hotu, tantu atu ki’ik ka bo’ot, inan-aman feto no mane sempre iha hadomi,” nia akresenta.

Iha atividade ne’ebé prepara iha SJB mak hanesan animasaun husi dader, prepara atu ema hotu bele asiste no sente loron domin ba ema hotu, la’os ba ema na’in ida ka rua de’it.

“Prepara atividade hanesan kanta, komedia, poezia, teatru, dansa kultura, dansa modernu, anima ho múzika, estudante SJB no husi mós kolega sira ne’ebé mai estajiu iha fatin ne’e sira mós kontribui hotu ba atividade ne’e. Ami-na’in hira kolabora hamutuk no inisativa hala’o atividade ne’e”.

Notísia relevante:UNITAL Selebra “Valentine Day” Liuhusi Limpeza Jerál

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here