Espoza Prezidente Republika, Cidalia Nobre Guterres. Imajen/Egas Cristovão

DILI, 14 fevereiru 2020 (TATOLI)–Espoza Prezidente Repúblika, Cidália Mouzinho Nobre Guterres apresia inisiativa husi Asosiasaun Halibur Defisiénsia Matan Timor-Leste (AHDMTL) ne’ebé atu halo angariasaun fundu ho tema “promove pás, diversidade no inkluzaun” ne’ebé sei hala’o iha 21 fevereiru iha Sekretaria Estadu Juventude no Desportu.

Komunikadu husi Gabinete Apoiu Atividade Cônjuge Prezidente Repúblika (GAAC-PR), ne’ebé Agência Tatoli asesu, ohin, hateten Espoza Prezidente Repúblika sei buka meiu oinsá bele serbisu hamutuk atu promove liután inkluzaun sosiál atu ema ho defisiénsia bele iha direitu hanesan ho sidadaun baibain.

Espoza Prezidente Repúblika haksolok ho inisiativa atu envolve ema ho defisiensia matan iha aprezentasaun kulturál Timor Furak nian iha Austrália. Espoza Prezidente Repúblika hein katak ema ho defisiénsia matan bele hola parte duni iha Timor Furak ninian aprezentasaun iha Austrália.

Angariasaun fundu ne’e sei hala’o hodi halibur osan ba organizasaun ho partisipasaun husi artista timoroan ninian.

AHDMTL nu’udár organizasaun ne’ebé halibur ema ho defisiensia matan no fornese formasaun inglés, portugés, komputadór no dansa kulturál.

Tuir dadus ne’ebé halibur ona, ema ho defisiénsia matan iha Timor-Leste hamutuk liu rihun 14.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here