Prezidente Konsellu Administrasaun ANATL, E.P, Romualdo da Silva. Foto/Natalino Costa.

DILI, 14 fevereiru 2020 (TATOLI) – Prezidente Konsellu Administrasaun Ajénsia Nasionál Aviasaun Timor-Leste, Empreza Públika (ANATL,E.P), Romualdo da Silva, observa hafoin mosu sirkulasaun Coronavirus husi sidade Wuhan, provínsia Hubei, Repúblika Populár Xina, parte ajénsia ne’e rejista katak movimentu pasajeiru sira hosi rai-li’ur mai Timor-Leste menus tebes kompara ho tinan kotuk.

“Iha duni impaktu hosi Coronavirus tanba hafoin mosu novidade virus ne’e, afeta tebes ba ita ninia ekonómi, liuiliu ba kestaun movimentasaun pasajeiru hosi rai-li’ur mai ita-nia rai”, dehan Dirijente ne’e ba Agência TATOLI via telefone, sesta ne’e.

Nia informa, hafoin inspesaun pasajeiru relasiona ho Coronavirus, passajeiru ne’ebé hosi rai-li’ur atu mai Timor-Leste ladún iha.

 “Bainhira virus ne’e mosu, ami laiha dadus kona-ba turista hira maka mai iha tinan ida-ne’e nia laran, tanba dadus kompletu iha Ministériu turizmu, maibé  atu dehan de’it turista sira ne’ebé mai Timor-Leste sira menus tebes”, nia akresenta.

Notísia Relevante: Governu Hola Medida Temporária Hodi Regula Sidadaun Estranjeiru Husi Xina

Nia realsa, parte ANATL halo de’it inspesaun ba pasajeiru jerál no tuir dadus ne’ebé iha, tinan kotuk iha ema estrajeiru  ne’ebé maka mai barak hosi Xina, maibé bainhira sirkulasaun Coronavirus mosu sidadaun xinez sira ladún barak.

Nune’e, Romualdo fudamenta tan katak, aleinde virus ne’e hamenus movimentu pasajeiru sira husi rai-li’ur mai rai-laran, movimentu iha Timor-Leste rasik mós diminui tanba sirkulasaun osan ne’ebé menus iha rai-laran.

“Ami nia inspesaun ba aviaun sira ne’ebé maka halo operasaun  iha ita nian rai, ami rejista mós movimentasaun ba rai-li’ur menus tebes, tanba kauza hosi Corononavirus. Nune’e bele fó impaktu ba ita nian ekonómia tanba kauza hosi sirkulasaun osan menus”, nia dehan tan.

Tuir Dirijente ne’e, Coronavirus la’os fó impaktu de’it ba movimentasaun pasajeiru iha Timor-Leste, maibé afeta mós Aeroportu Indonézia no Singapura.

Maske nune’e, Romualdo da Silva, realsa operasaun ba aviaun sira sei kontinua la’o hanesan bain-bain.

“Ha’u bele dehan kona-ba kestaun Coronavirus, pasajeiru bele menus maibé operasaun ba aviaun Sriwijaya, Citilink, Trans Nusa, no Air North sira nia opersaun iha Timór kontinua la’o ho normál”, nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here