Deputadu Bankada PD, Mariano Assanami Sabino. Imajen Tatoli/Egas Cristóvão

DILI, 14 fevereiru 2020 (TATOLI)—Deputadu Bankada Parlamentár Partidu Demokrátiku (PD), Mariano Assanami ‘Sabino’ entrega ona karreta ho marka Pajero Sport ba Sekretariadu Parlamentu Nasionál.

Enkuantu, Deputadu Bankada Parlamentár Kmanek Haburas Unidade Nasionál Timor Oan (KHUNTO), António Verdiál mós entrega hotu maibé hanesan troka de’it tanba entrega tiha Pajero Sport, foti fali Prado.

Sekretária Jerál Parlamentu Nasionál, Cedelizia Faria dos Santos, esplika katak totál karreta foun ne’ebé mak Parlamentu sosa hamutuk 35 maibé deputadu na’in-rua mak entrega filafali sira-nia karreta Pajero Sport.

“Iha karta señor Deputadu Assanami dehan de’it katak uluk sai ona membru Governu no iha responsabilidade ba nia-an rasik para buka karreta ba nia uza. Ida-ne’e mak nia razaun”, Cedelizia Faria dos Santos, informa ba jornalista sira, iha nia knaar fatin, Sekretariadu Parlamentu Nasionál, sesta ne’e.

Deputadu Assanami entrega ona karreta iha 11 fevereiru. Hafoin Assanami entrega karreta ne’e, deputadu balun hatama kedas pedidu hodi uza fali karreta refere.

“Deputadu Assanami nian mak entrega no la husu troka. Oras ne’e nia uza karreta privadu. Se halo fiskalizasaun bele halo fali pedidu mai ita bele fasilita karreta operasionál”, Cedelizia informa.

Sekretária Jerál PN ne’e hatutan, Deputadu António Verdiál entrega fali karreta Pajero Sport tanba prefere liu Prado.

Jornalista sira konfirma ho Deputadu Mariano Assanami Sabino no Deputadu António Verdiál maibé lakohi komenta asuntu ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here