Prezidente ANPM, Gualdino da Silva ho Diretora Empreza EMG, Brenda Lei, asina akordu kontratu prospesaun no peskiza mármore iha Manatuto. Imajen/Florencio Miranda Ximenes.

DILI, 14 fevereiru 2020 (TATOLI) – Autoridade Nasionál Petróleu no Minerál (ANPM) reprezenta Ministériu Petróleu no Minerál (MPM) asina akordu kontratu prospesaun no peskiza  mármore ho Kompañia Elegant Marble Group Unip, Limitada (EMG), husi Xina.

Vise-Prezidente ANPM, José Gonçalves, hatete akordu ne’e ho objetivu atu estabelese enkuadramentu ba avaliasaun potensialidade rekursu mármore no meiu sira atubele dezenvolve no komersializa rekursu refere iha área dedikadu ne’ebé lokaliza iha suku Uma Kaduak, Postu Administrativu Laclo, Munisípiu Manatuto ho períodu fulan 18.

“Ita hili empreza ne’e atu kontinua peskiza no hodi komprende di’ak liután potensialidade ne’ebé ita iha hodi dezenvolve no kria valór ne’ebé di’ak ba Timor-Leste no empreza nia an rasik”, Vise-Prezidente ANPM afirma hafoin selebra akordu ne’e iha edifísiu Ministériu Finansa, Aitarak-Laran, ohin.

Hodi dehan peskiza internál ne’e, Governu liuhusi ANPM iha 2018 hetan katak iha potensialidade haree husi perspetiva asuntu tékniku no finanseiru atu komersializa rekursu mármore. “Ita-nia peskiza ne’e fó rezultadu di’ak tebes, entaun ami komesa lori ita-nia potensialidade ba merkadu internasionál atu empreza EMG Group ne’e dezenvolve rekursu ne’e”, katak.

Durante períodu prospesaun no peskiza, EMG sei hala’o serbisu oin-oin inklui serbisu kampu nian hodi halo mapa distribuisaun mármore, determina estatístika bloku mármore nian, halo teste sira seluk no hala’o trial mining atu determina kualidade no mós kuantidade mármore antes prepara relatóriu viabilidade komersiál ba dezenvolvimentu rekursu mármore mai ANPM.

Área prosesaun no peskiza mármore ne’e kuaze ektare rihun 16, maibé área ne’e sei iha mudansa karik iha peskiza durante fulan 18 mak deteta iha mármore, empreza bele define loos área ne’ebé sira hakarak halo esplorasaun.

“Investimentu husi akordu ida ne’e mak iha faze peskiza hamutuk orsamentu rihun $800 ba fulan 18 nia laran. “Ita halo ona servisu ho empreza ida ne’e durante tinan rua, maibé negosiasaun foin hahú fulan neen kotuk”, hatete.

Hodi dehan após susesu husi serbisu prospesaun no peskiza, Governu bele hili dalan atu partisipa iha investimentu ida ne’e hodi dezenvolve no komersializa rekursu mármore ho hanoin atu mellora valór komersiál husi dezenvolvimentu rekursu refere.

“Ita hein katak produsaun mármore husi área refere bele komesa iha tinan 2021. Hola parte iha kompromisu programa no servisu durante períodu prospesaun no peskiza”.

EMG kompromete hodi fornese oportunidade servisu ho númeru ne’ebé razoavel ba abitante sira ne’ebé hela besik iha área prospesaun no peskiza.  Enkuantu númeru serbisu refere sei aumenta iha faze dezenvolvimentu no operasaun pedreira mármore iha futuru.

Diretora Kompañia EMG Group, Brenda Lei, agradese ba esforsu Governu Timor-Leste ho empreza nia parte iha prosesu negosiasaun to’o asina akordu ne’e nu’udar lansamentu ofisiál ba indústria modernu iha Timor-Leste.

“Ami fiar katak sei susesu harii indústria mármore no sei kria kampu traballu, impostu, treinamentu ho vantajen teknolojia ba sosiedade. Ami atu hetan susesu bainhira Estadu no povu Timor-Leste apoia”, adianta.

Diretora ne’e garante rekursu minerál liuliu fatuk mármore ne’e sei kontribui ba dezenvolvimentu ekonomia nasaun ne’e. Tanba ne’e, EMG sei la paradu de’it iha produsaun materiál prima de’it, maibé sei dezenvolve minerasaun, prosesamentu ba materiál, armazein no lojístika no prioritiza hodi promove mármore Timor-Leste ba merkadu internasionál nu’udar dezenvolvimentu potensiál iha longu prazu.

Nia dehan empreza ne’e iha ona konesaun internasionál extensiva no iha ona esperiénsia internasionál atu partisipa iha esplorasaun mineira no produsaun venda ba Xina, Turkia, Grésia, Itália no Kroásia.

 Prezidente Autoridade Munisípiu Manatuto, Armindo Souza, afirma Manatuto oan prontu suporta no kontribui ba atividade peskiza mármore durante fulan-18 iha suku Uma Kaduak, Postu administrativu Laclo, Munisípiu Manatuto.

“Ami sei suporta tuir kbiit ne’ebé iha no espera katak peskiza ne’e ho rezultadu di’ak atu ba oin iha benefísiu ba ita-nia rai no ami Manatuto oan”.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here