Ministru Negósiu Estranjeiru no Kooperasaun, Dionísio da Costa Babo Soares. Imajen/Egas Cristóvão

DILI, 14 fevereiru 2020 (TATOLI)–Tuir planu, aban (15/02), Ministru Negósiu Estranjeiru no Kooperasaun (MNEK), Dionísio da Costa Babo Soares sei dezloka ba Nova Zelándia atu reprezenta Governu hodi agradese ba Governu Nova Zelándia, ne’ebé fó ona apoiu hodi evakua estudante timoroan sira sai husi Sidade Wuhan, Xina, tanba coronavirus.

“Ha’u mai relata ba Prezidente Repúblika (PR), Francisco Guterres Lú Olo, kona-ba ita-nia estudante sira ne’ebé oras ne’e iha Nova Zelándia, no Primeiru-Ministru, Taur Matan Ruak haruka Ministru Negósiu Estranjeiru no Kooperasaun atu arranka bá Nova Zelándia hodi hato’o ita-nia agradesimentu diretamente ba Governu Nova Zelándia”, Dionísio hato’o ba mídia hafoin enkontru ho PR Lú Olo iha Palásiu Prezidente Nicolau Lobato, Bairru Pité, Dili, ohin.

Kona-ba dezlokasaun ba Nova Zelándia, Ministru Dionísio Babo esplika, nia sei lori Governu Timor-Leste nia naran hato’o agradesimentu ba Governu Nova Zelándia ne’ebé tulun lori-sai estudante timoroan hosi Xina no mós fó asisténsia tuir rekizitu saúde durante estudante sira-ne’e hela iha Nova Zelándia.

Ministru Negósiu Estranjeiru mós informa, nia sei akompaña estudante sira-ne’e filamai Timor-Leste iha semana oin.

Iha semana kotuk, Prezidente Repúblika, Francisco Guterres Lú Olo, lori Estadu Timor-Leste nia naran, haruka ona karta ba Governadór-Jerál Nova Zelándia hodi agradese ba Estadu Nova Zelándia nia jestu solidáriu hodi fó apoiu ba estudante timoroan sira-ne’e.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here