Komandante Jerál PNTL, Komisáriu Faustino da Costa. Imajen/António Gonçalves

DILI, 13 fevereiru 2020 (TATOLI)–Komandante Jerál Polísia Nasionál Timor-Leste (PNTL), Komisáriu Faustino da Costa konsidera timoroan sira ne’ebé uza identidade falsu iha mídia sosiál hodi tolok no insulta líder nasionál sira, timoroan hirak-ne’e lakon identidade no kultura respeita malu mós lakon. 

Komisáriu Faustino hato’o konsiderasaun ne’e, hafoin hamutuk ho Segundu Komandante Jerál PNTL, Mateus Fernandes hala’o reuniaun ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“Timoroan sira barak, kuaze lakon ona identidade hanesan timoroan no tradisaun hanesan timoroan. Buat ida respeita malu ne’e kuaze laiha tiha de’it. La’ós tanba demokrasia ne’e iha, maibé keta haluha katak kultura Timor respeita ema ne’e tenke iha nafatin”, Faustino informa.

Ho situasaun ne’e, Komisáriu ne’e promete katak Komandu PNTL sei kontinua esforsa atu buka meiu oinsá kombate atitude ne’e.

“Kona-ba ne’e ita sei haree saida maka ita bele hetan ninia mekanizmu, kona-ba maneira ba prevensaun”, Faustino promete.

Antes ne’e, Xefe Estadu Maiór-Jenerál FALINTIL-Forsa Defeza Timor-Leste (F-FDTL), Majór-Jeneráll Lere Anan Timur mós konsidera liafuan tolok no insulta ne’ebé ema deskoñesidu uza identidade falsu hodi lansa iha mídia sosiál hasoru líder nasionál sira, nu’udár sinál ida-ne’ebé hatudu katak timoroan ninia kultura respeita malu lakon ona.

Lere dehan, bainhira povu ida lakon ninia kultura no identidade, signifika la’ós ona povu, no valór funu ba libertasaun pátria saugati de’it.

Tanba ne’e, Lere husu timoroan hotu liuliu joven sira atu hatudu hahalok respeita líder istóriku sira, no buka atu aprende hamutuk ho sira, hodi serbí di’ak liután nasaun iha futuru.

Entretantu, iha tinan 2018, Servisu Investigasaun Kriminál, investiga ona ema balun ne’ebé deskonfia insulta líder istóriku sira liuhusi mídia sosiál, hanesan Kay Rala Xanana Gusmão no Marí Alkatiri.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here