Prezidente Autoridade RAEOA-ZEESM, José Luís Guterres ‘Lugu’. Imajen/António Gonçalves.

DILI, 13 fevereiru 2020 (TATOLI)–Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), José Luís Guterres ‘LUGU’, iha tempu badak sei loke diskusaun ho entidade Oé-Cusse tomak, hanesan Autoridade Lokál no lia-na’in sira, hodi bele hamosu kompreensaun komún, nune’e tau-matan hamutuk ba prosesu dezenvolvimentu rejiaun ne’e liuhosi partisipasaun ativu Povu Enklave Oé-Cusse.

Iha soru-mutuk ho tema “Seguransa Sosiál no Nia Benefísiu” ho xefe suku, xefe aldeia no funsionáriu sira, José Luís konsidera prosesu dezenvolvimentu ne’ebé la envolve povu sei difísil la’o bá-oin.

“Povu Oé-Cusse iha direitu atu hatene kona-ba utilizasaun orsamentu ho ninia benefísiu tomak, liuhosi realizasaun enkontru ho autoridade no xefe suku sira”, nia dehan iha Palaban, Oé-Cusse, kinta ne’e.

Tuir nota ne’ebé dirije ba Agência TATOLI, ohin, diskusaun ne’e hodi fortifika dezenvolvimentu iha rai Oé-Cusse.

Nune’e, liuhosi biban diskusaun, Prezidente Autoridade kontinua enkoraja entidade hotu iha Oé-Cusse atu koopera ho autoridade atuál hodi kontribui nafatin ho hanoin krítiku, nune’e bele hadi’a buat ne’ebé ladún di’ak ba interese Povu Oé-Cusse.

Nia mós komprometidu hodi kontinua respeita nafatin buat ne’ebé autoridade anteriór halo tiha ona hodi hadi’a hikas buat ne’ebé ladi’ak ba interese povu Oé-Cusse nian.

“Ho respeitu tomak, ha’u mai servisu ho fuan tomak. Se bainhira imi haree iha buat ruma ladi’ak, husu atubele iha krítika hodi hadi’a”, nia akresenta.

Kona-ba funsionáriu kontratadu hirak ne’ebé serbisu husi tempu autoridade anteriór nian, Prezidente Autoridade Atuál sei estende kontratu funsionáriu kontratadu to’o fulan-neen bá-oin no hafoin fulan ne’e ramata, Autoridade RAEOA hamutuk ho Komisaun Funsaun Públika (KFP), sei loke konkursu públiku hodi fó oportunidade ba entidade hotu hodi bele konkorre ba vaga hirak ne’ebé sei loke.

Komprimisu ne’e, tuir LUGU hodi bele define profisionalizmu husi kada sidadaun, liuliu Oé-Cusse oan hodi bele partisipa ativu iha prosesu dezenvolvimentu hodi la haree ba kartaun A no B.

“Ha’u sei la hasai ka hatama ema tanba de’it kartaun. Ida-ne’e ha’u ninia komprimisu ba Povu Oé-Cusse tanba ha’u mai atu serbí ho fuan tomak”, nia subliña.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here