Ezemplu abrazaun ne'ebé akontese iha Java Leste, Indonézia. Foto google

DILI, 13 fevereiru 2020 (TATOLI) – Sekretáriu Estadu Ambiente (SEA), Demétrio do Amaral de Carvalho, hatete atu prevene erozaun presiza kuda ai-oan no mellora tratamentu ba ezgotu sira iha kapitál no munisípiu sira.

“Ita presiza hasa’e meiu sensibilizasaun ba sidadaun hotu atu iha konxiénsia labele sunu no tesi ai arbiru hodi kontribui ba kuda ai-oan, labele soe lixu arbiru no mellora tratamentu ezgotu sira”, SEA afirma iha Mandarin, ohin.

Hodi dehan sidadaun hotu iha papél no responsabilidade atu haree ba foho leten sira ne’ebé ai laiha ona, bele kuda ai-oan hodi prevene erozaun.

“Prevensaun mak ita tenke kuda ai barak liután no kuda duut sira atu kaer rai metin liu no ezgotu sira iha Dili laran tenke iha tratamentu di’ak hodi hasai sedimentasaunsira para depois labele sai fali ameasa ba populasaun”, katak.

Nune’e, eis Deputadu Bankada PLP ne’e kontinua notifika sira atu loke estrada ba foho leten sira tenke trata sira-nia lisensa ambientál atu minimiza impaktu sira ba erozaun.

Polítika SEA nian kada semana tenke kuda ai-oan hodi aliña ba Prezidente Repúblika nia programa katak: “Sidadaun ida, ai-hun ida”.

“Ita-nia Governu hakarak reforsa prosesu ne’e hodi halo produsaun ba ai-oan millaun $1 kada tinan no ita-nia sentru viveiru sira prodús ona, tanba ne’e ita tenke halo esforsu hodi kuda ai”, dehan.

Kada semana SEA kuda ona ai-oan ba fatin risku erozaun no dezastre naturál kuaze rihun 10 ona.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here