Sekretáriu Estadu Ambiente (SEA), Demétrio de Amaral de Carvalho. Imajen/Tatoli Tatoli Egas Cristovão.

DILI, 13 fevereiru 2020 (TATOLI) – Sekretáriu Estadu Ambiente, Demétrio do Amaral de Carvalho, hatete presiza lei atu bandu importasaun saku plástiku.

“Ita presiza dekretu lei tanba ita atu bandu halo importasaun saku plástiku tenke iha lei”, Demétrio afirma hafoin asina memorandu ho Mercy Corps iha edifísiu SEA, Bebora, ohin.

Eis Deputadu Bankada PLP ne’e dehan plástiku hanesan problema sériu tebes tanba fó efeitu ba biodiversidade, ambiente no liuliu ba kontribui alterasaun klimátika iha Timor-Leste.

Hodi dehan dekretu lei kona-ba eliminasaun, importasaun, no produsaun saku plástiku uzu úniku, embalajen no objetu husi plástiku ne’e aprezenta ona iha maiu 2019 ba iha Konsellu Ministru (KM) hodi kompleta no dezenvolve ho dokumentu no SEA envia ona karta ba KM atubele re-ajenda tanba sirkulár sai tiha ona ne’ebé laiha impedimentu semana oin KM halo diskusaun no aprovasaun.

“Lei ne’e mak aprova, fó ita kondisaun di’ak liu atu ezekuta polítika zero plástiku”, katak.

SEA dehan polítika resiklajen sira ne’e bele hala’o daudaun ona sein lei, maibé atu elimina plástiku mak presiza lei. “Mekanizmu sira atu halo resiklajen ne’e esforsu ida ne’ebé ita presiza halo ona tanba ita loron-loron moris ho plástiku”, adianta.

Timor-Leste presiza mós iha kapasidade atu kontrola no bandu plástiku uzu sira tanba Prezidente Repúblika promulga ona lei Biodiversidade iha semana rua ba kotuk, ne’ebé fó tan espasu ida ba SEA atubele reforsa servisu di’ak liután.

“Ita presiza kapasidade atu hasoru alterasaun klimátika liuliu kombate poluisaun la’ós plástiku de’it, maibé bee fo’er sai husi sintina tama ba ezgotu sira, suar sira husi ita-nia atividade indústria ki’ik sira”, katak.

Dekretu ida ne’e rasik atu prevene no hamenus impaktu hosi rezíduu iha ambiente, no haree kle’an liu, liuliu ba produtu plástiku sira ne’ebé labele resiklavel hodi prevene no bandu atu fa’an, inklui importasaun husi determinadu objetu husi plástiku.

Diploma ne’e hakarak estabelese mós prinsípiu fundamentál sira maka hanesan prekausaun, prevensaun ba dezenvolvimentu sustentavel, seguransa ambientál globál, poluidór no re-utilizasaun resiklajen valorizasaun no enerjétika.

Eliminasaun saku plástiku uzu úniku relasiona ba alternativu sira ne’ebé maka halo balu ona maka halo saku plástiku husi ai-farina ne’ebé empreza balun intervene ona, maibé alternativa seluk hakarak atu enkoraja operadór ki’ikoan sira bele prodús husi matéria orgánika hanesan kohe, bote, saku sira ne’ebé bele halo ho matéria orgánika.

Dekretu lei ida ne’e boot uitoan to’o artigu 80, tanba nia esplika husi definisaun aspetu sira ne’ebé kontein iha lei ne’e inklui mós dokumentu aneksu ida kona-ba lista sira ne’ebé bele importa mai Timor-Leste ka prodús iha Timor- Leste.

Lista ne’e iha tipu plástiku 800 ne’ebé bele autoriza. Entretantu tipu sira ne’ebé la tama iha lista ne’e labele, más ba kondisaun exesionál ba ema ka entidade ruma importa nia sei hetan taxa husi kustu báziku porsentu 30 husi valór ne’ebé nia sosa iha merkadu.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here