Komandante Jerál PNTL, Faustino da Costa. Imajen /Antonio Goncalves

DILI, 13 fevereiru 2020 (TATOLI)–Komandu Polísia Nasionál Timor-Leste (PNTL), komprometidu sei fó seguransa másima ba situasaun rai-laran, bainhira Xefe Estadu foti kualkér desizaun kona-ba situasaun polítika atuál. 

Komandante Jerál PNTL, Komisáriu Faustino da Costa hato’o asuntu ne’e, hafoin hamutuk ho Segundu Komandante Jerál  PNTL, Mateus Fernandes hasoru-malu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“Ita hotu akompañia ita-nia líder sira, sosiedade sivíl, durante diálogu ho Xefe Estadu sempre sira sai mai hamriik duni iha fatin ida-ne’e (fatin konferénsia imprensa). Sira sempre fó mensajen katak buat hotu entrega ba Prezidente Repúblika. Tanba ne’e, ita hotu hakmatek rona nafatin mensajen hirak-ne’e, akompaña prosesu ne’e tomak. Ami husi instituisaun PNTL sei asegura saida mak Estadu deside no ami sei halo deklarasaun konjunta hamutuk ho instituisaun defeza ninian”, Faustino deklara.

Nia mós informa katak, enkontru rutina ne’ebé halo ho Prezidente Repúblika, normalmente PNTL aprezenta situasaun atuál nível territóriu nasionál.

“Ita hotu akompaña, ita-nia situasaun polítika rai-laran, maibé ami aprezenta nafatin katak situasaun iha territóriu nasionál la’o di’ak, kalma, hakmatek no kontroladu. Loos duni, maski iha akontesimentu ki’ikoan balun, hanesan kazu akontesimentu iha Tekinomata, Laga, Munisípiu Baucau, kazu ida iha Letefoho, Ermera, kazu asidente joven na’in-rua mate iha Hera, sira-ne’e mak aprezenta ba Prezidente Repúblika. Aproveita mós hato’o ba Prezidente Repúblika kona-ba saida mak komandu sei fó ba nia membru sira iha kraik, liga ho desizaun ba situasaun atuál”, Faustino haklaken.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here