Diretór Jerál SEFOPE, Paulo Alves. Imajen/Egas Cristovão

DILI, 13 fevereiru 2020 (TATOLI) – Diretór Jerál Empregu Esteriór (DNEE) Sekretáriu Estadu Formasaun Profisionál no Empregu (SEFOPE), Paulo Alves, fó sai katak sei haruka timoroan na’in-12 bá serbisu iha Austrália, sábadu ne’e, iha ámbitu programa Pacific Labour Scheme (PLS).

“Tanba sira hetan ona kontaktu hosi empreza prosesamentu na’an nian, ohin, sira asina ona kontratu ho kompañia no asina ona deklarasaun ho parte SEFOPE”, Paulo Alves dehan ba TATOLI, hafoin serimónia asinatura kontratu ho traballadór sira, ohin, iha salaun enkontru SEFOPE, Caicoli.

Paulo Alves hatete dezde 2019, Estadu Timor-Leste konsege haruka ona timoroan na’in-105 bá Austrália liuhosi PLS.

Notísia relevante : Governu TL ho Australia Asina Ona Akordu PLS

Diretór ne’e mós hato’o katak kontratu serbisu ba programa ida ne’e sei dura to’o tinan tolu nia- laran no timoroan sira ne’ebé maka serbisu iha Austrália, liuhosi programa ne’e, barak liu haknaar an iha área prosesamentu na’an nian, inklui setór ospitalidade.

“Ita-nia maluk sira ne’ebé serbisu iha programa PLS ba tinan tolu nian ne’e barak liu serbisu iha prosesamentu ba na’an nian, iha empreza Meat Fill Group, nune’e mós iha área otelaria”, Paulo katak.

Governu Timor-Leste iha kompromisu hodi kontinua haruka traballadór sira bá Austrália, liuhosi programa PLS no Seasonal Worker Programme (SWP) ho objetivu minimiza taxa dezempregu iha rai-laran.

Entretantu, iha janeiru-fevereiru nia-laran SEFOPE haruka ona traballadór hamutuk 300-resin liuhosi programa SWP.

Notísia relevante : Timoroan 63 sei Bá Serbisu iha Austrália Durante Tinan Tolu

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here