Primeiru-Ministru, Taur Matan Ruak. Imajen Tatoli/Egas Cristovão

DILI, 13 fevereiru 2020 (TATOLI)–To’o oras ne’e, Governu seidauk simu proposta husi kualkér instituisaun inklui Ministériu Públiku (MP), kona-ba atu kontratu advogadu timoroan hodi akompaña kazál timoroan ne’ebé Ministériu Públiku Indonézia akuza ho pena prizaun tinan 17 tanba komete kazu droga. 

Primeiru-Ministru (PM), Taur Matan Ruak hato’o asuntu ne’e, hafoin enkontru semanál ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“Kazu ne’e sei iha prosesu. Tanba ne’e, ha’u sei adianta buat ida-ne’e. Ha’u seidauk simu proposta ruma, tanba ne’e ha’u seidauk halo komentáriu”, PM Taur ko’alia ba mídia hafoin enkontru ho Xefe Estadu.

Antes ne’e, Prokuradór Jerál Repúblika (PJR), José da Costa Ximenes hateten, Ministériu Públiku (MP), propoin ba Governu atu halo akompañamentu hodi defende kazál timoroan ne’ebé Prokuradoria Jerál Indonézia nian akuza ho prizaun tinan 17.

Prokuradór Jerál hato’o asuntu ne’e hafoin hasoru-malu ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili.

“Governu tenke kontratu advogadu privadu ida-ne’ebé di’ak atubele defende sira. Bele haree advogadu timoroan di’ak ida hamutuk ho advogadu ida-ne’ebé oras ne’e iha ona, atu halo akompañamentu ba sira to’o desizaun tránzitu enjulgadu. Entaun, ha’u-nia sujestaun mak ida-ne’e”, nia hateten.

Prokuradór ne’e esplika, kazál timoroan iha Indonézia, Ministériu Públiku akompañia de’it, no Ministériu Públiku deklara fila-fila ona katak uluk Prokuradór Jerál rasik ba ko’alia ho autoridade sentrál Indonézia nian iha Jakarta, ko’alia ho Ministru Justisa ho Wakapolri, intensaun hakarak atu dezenvolve investigasaun konjunta ida, tanba merkadu bootliu iha Ázia no iha mundu, ida mak Indonézia, la’ós Timor.

Antes nee, advogadu privadu kazál timoroan, Jemmy Haekase la simu desizaun ba akuzasaun husi prokuradór Atambua Indonézia hodi kondena nia kliente na’in-rua, José Soares Pareira (34) no Angela Soares (30) ho ameasa pena prizaun tinan 17 no selu multa ne’ebé diferente ho osan montante millaun $1.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here