Prezidente Komisaun B, Adérito Hugo da Costa. Imajen Tatoli/Egas Cristovão

DILI, 13 fevereiru 2020 (TATOLI)—Prezidente Komisaun B (trata asuntu Negósiu Estranjeiru, Defeza no Seguransa), Deputadu Adérito Hugo da Costa, hateten diplomata sira ne’ebé reprezenta Estadu Timor-Leste iha rai-li’ur iha papél dada investidór mai halo investimentu iha Timor-Leste.

“Misaun diplomata sira reprezenta Estadu Timor-Leste iha país ne’ebé sira destaka ba. Signifika sira iha obrigasaun hala’o serbisu hanesan promove Estadu Timor-Leste iha ne’ebá, nune’e mós bele lori investidór mai halo investimentu iha Timor-Leste”, nia  dehan ba jornalista iha Parlamentu Nasionál, kinta ne’e.

Deputadu Adérito haklaken, diplomata sira iha papél halo promosaun ba poténsia sira hanesan minarai, setór turizmu, agrikultura, kafé, peska no pekuária.

Nia haktuir, durante ne’e Timor-Leste partisipa ona espozisaun iha Milano, Itália no Korea Súl nian no oras ne’e posibilidade Timor-Leste sei partisipa iha Dubai.

“Misaun ita-nian iha ne’ebá bele tuir espozisaun sira no serbisu hamutuk ho liña ministeriál nune’e bele envolve ita-nia produtu potensiál sira partisipa iha espozisaun internasionál sira-ne’e”, Hugo tenik.

Prezidente Komisaun B ne’e rekoñese vantajen ba Timor-Leste nia partisipasaun ba espozisaun ne’e ba oras ne’e seidauk fó rezultadu, maibé hanesan investimentu ba futuru.

Prezidente Komisaun B ne’e husu embaixadór na’in-sia (9) ne’ebé foin lalais simu pose hosi Prezidente Repúblika, Francisco Guterres ‘Lú Olo’ bele halo serbisu hirak-ne’e iha rai-li’ur.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here