Prezidente Konsellu Administrasaun BNCTL, Brigido de Sousa. Imajen Egas Cristovao

DILI, 13 fevereiru 2020 (TATOLI) – Banku Nasionál Komérsiu Timor-Leste (BNCTL, sigla portugés) simu tan ona proposta tolu hosi empreza sira hodi asesu ba eskema garantia kréditu.

“Ami simu tan ona proposta tolu hosi empreza sira, no agora daudaun sei prosesu hela dokumentu, kuandu remata ona maka haruka ba Banku Central”, Prezidente Konsellu Administrasaun BNCTL, Brígido de Sousa, informa ba TATOLI via mídia sosiál, ohin.

Prezidente BNCTL ne’e hatutan proposta tolu ne’ebé simu ne’e negósiu iha área otelaria no pekuária.

Antes ne’e, BNCTL mós finansia ona empreza rua hosi Lautem iha área turizmu nian liuhusi eskema refere, ida ba restaurante, ida ba ótel iha Tutuala.

Empreza rua ne’ebé maka asesu ona ba eskema garantia ne’e liuhosi prosesu hatama proposta no BNCTL halo avaliasaun no analiza hodi haree katak proposta ne’e merese atu asesu ba eskema ne’e, entaun BNCTL haruka ba Banco Central Timor-Leste (BCTL) no aprova.

Proposta rua ne’ebé asesu ona eskema ne’e iha novembru 2019, kada proposta hetan rihun $10 no daudaun hala’o ona sira-nia atividade negósiu.

“Antes hetan ne’e, sira-nia atividade la’o tiha ona, no ami-nia ekipa mós bá halo ona monitorizasaun”, katak.

Eskema Garantia Kréditu ne’e aprova ona husi Governu Konstitusionál Daneen, ho prevee millaun $4 liuhusi Orsamentu Jerál Estadu (OJE) 2017.

Nune’e iha jullu 2019, Banku Sentrál Timor-Leste (BSTL) lansa ona sistema refere ba empreza ki’ik no média no prontu ona atu simu pedidu kandidatu ba kréditu ne’e.

Programa ne’e jere husi BCTL no implementa husi instituisaun kréditu iha Timor-Leste no daudaun ne’e BNCTL partisipa hanesan kredór (fó kréditu).

Notísia relevante : BNCTL Finansia Empreza Rua Liuhusi Eskema Garantia Kréditu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here