Mapa eskola iha RAEOA. Imajen hosi portál zeesm.tl.

DILI, 12 fevereiru 2020 (TATOLI)–Adjuntu Diretór Serbisu Saúde Rejionál RAEOA, Facundo Lafo hateten, Serbisu Saúde RAEOA hala’o monitorizasaun ba sistema serbisu saúde integradu hodi mellora no hadi’a jestaun atendimentu ho nia prontidaun tomak ba serbisu husi setór saúde ho várius estratéjiku iha RAEOA.

Nia hatutan, ekipa konjunta Serbisu Saude RAEOA hala’o vizita traballu hodi halo supervizaun no monitorizasaun ba Postu Saúde Oelkaem no Roti.

“Vizita traballu ne’e hala’o hodi verifika sistema serbisu saúde integradu mak hanesan disponibilidade profisionais saúde, funsionamentu ekipamentus médikus inklui disponibilidade aimoruk ba populasaun sira ne’ebe halo tratamentu iha Postu Saúde área refere,” dehan Adjuntu Diretór Serbisu Saúde Rejionál RAEOA, Facundo Lafo, liuhusi komunikadu imprensa ne’ebe TATOLI asesu, tersa (11/2/2020).

Durante vizita traballu, Ekipa konjunta Serbisu Saúde RAEOA hala’o mós diskusaun ho pesoál médiku kona-ba várius programa saúde nian hanesan prevensaun moras transmissíveis, saúde materna-infantil, esforsu hodi mellora nutrisaun no saúde ambientál.

Iha verifikasaun ne’e, ekipa konjunta Serbisu Saúde RAEOA rekuñese katak fornesimentu bee ba postu saúde sira sai mós kauza ne’ebe presiza hetan atensaun iha tempu oin mai.

“Vizita ne’e nu’udar monitorizasaun trimestral  hodi rona sira-nia preokupasaun, dezafiu no problema ne’ebé sira hasoru iha sira-nia serbisu fatin,” nia dehan.

Husi rezultadu vizita traballu ne’e,  nia hatutan,Ekipa konjunta Serbisu Saúde RAEOA propoin atu halo monitorizasaun presiza hala’o ho másimu, hodi nune’e prestasaun ba atendementu serbisu setór saúde bele ezekuta ho maneira ideál liuhusi mekanizmu kontrolu ne’ebé efetivus.

Komunukadu ne’e infroma, antes ne’e Diretór Saúde RAEOA Marcos Seo hamutuk ho Ekipa konjunta Serbisu Saúde RAEOA ala’o mós supervizaun direta iha terenu hamutuk ho SAMES no Dirasaun Nasional Kontrolu Doensas hodi distribui ekipamentu mediku protesaun Coronavirus ba iha Postu Integradu iha RAEOA liu-liu ba postu entrada sira hanesan Sakato, Oesilo, inklui postu hirak ne’ebe iha prezensa Unidade Polisia Fronteira (UPF) ne’ebe kolokadu iha Lakufoan, Kiubiselo, Haumeni Ana, Bijae Sunan, Noa Ana no Citrana.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here