Proreitor Asuntu Akademiku, UNTL, Miguel Maia dos Santos.Imajen/ Tatoli Egas Cristovao

DILI, 12 fevereiru 2020 (TATOLI)–Estudante Ensinu Sekundária hamutuk ema rihun 4.211 ne’ebé liu ona prosesu ingresu ba Universidade Nasional Timor Lorosa’e (UNTL), to’o oras ne’e sira ne’ebé halo ona inskrisaun hamutuk ema rihun 3.589 no ema na’in 622 mak to’o agora seidauk halo inskrisaun.

Pro-Reitór Asuntu Akadémiku UNTL, Miguel Maia dos Santos haktuir posibilidade UNTL sei hanaruk inskrisaun ba estudante foun ema na’in 622 ne’ebe asesu ba UNTL mak seidauk rejistu karik UNTL sei fasilita hodi halo inskrisaun.

“Ita la hatene ema sira ne’e osan mak laiha ka ou ba eskola tiha ona iha rai liur ka keta karik Ministériu Ensinu Superiór Siênsia no Kultura (MESSK) mak naran kloka de’it estudante sira ne’e iha departamentu arbiru de’it mós ita la hatene,” dehan Miguel Maia dos Santos ba Ajênsia TATOLI iha nia knar fatin, kuarta (12/2/2020).

Tuir nia, loloos ne’e tempu inskrisaun taka tiha ona iha loron 10 fevereiru 2020 maibé tanba ema hotu iha kakutak no mós fuan hodi hateke ba ema seluk ne’ebé mai ho sira ninia razaun oin-oin entaun ho premisaun reitór nian hanesan prezidente ba konsellu jestaun foti desizaun hodi kontinua fasilita estudante sira ne’e.

“Agora reitór mós kontinua fó hela atensaun ba asuntu ne’e. Ita hatene reitór nia premisaun orienta ami hodi hateten ba malu ona atu kontinua atende hela hodi nune’e ita bele hare to’o loron ohin nian sira na’in hira mak mai halo inskrisaun tan,” nia hateten.

Entretantu, Pro-Reitór Asuntu Akadémiku ne’e halo mós konfirmasaun ho Diretór Jéral katak ohin )kuarta, 12 fevereiru 2020) totál estudante ne’ebé mak mai halo ona inskrisaun hamutuk na’in 3.589 husi ema na’in 4.211 ne’ebé liu teste.

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here