Prokuradór Jerál Repúblika, José da Costa Ximenes. Imajen Tatoli/Egas Cristovão

DILI, 12 fevereiru 2020 (TATOLI)–Ministériu Públiku (MP), ne’ebé tinan ida-ne’e sei komemora nia aniversáriu ba dala-20, sei aposta iha prestasaun servisu ho kualidade no efetivu liu.

Prokuradór Jerál Repúblika (PJR), José da Costa Ximenes hato’o asuntu ne’e, hafoin enkontru mensál ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“Iha retiru anuál Ministériu Públiku nian konklui katak, tinan ida-ne’e, Ministériu Públiku kompleta ona ninia konstrusaun ba tinan 20. Tanba ne’e, ita konklui katak Ministériu Públiku ne’e hanesan labarik ida karik, bele dehan joven ona. Tanba ne’e, ninia atusauan sira tenke reforsa iha kualidade, efetivu no lalais iha ninia intervensaun sira”, José da Costa informa ba mídia.

Nia esplika, iha retiru Ministériu Públiku konklui mós atu aumenta kuadru Prokuradoria Jerál Distritál tuir volume traballu.

Nia hatutan mós katak, foin lalais, Konsellu Superiór Ministériu Públiku, nomea ona Prokuradór Estajiáriu na’in-lima hanesan Prokuradór Kareira hahú 1 fevereiru liubá.

Prokuradór kareira hirak-ne’e sei hala’o sira-nia funsaun iha Prokuradoria Jerál Distritál tuir desizaun Konsellu Superiór Ministériu Públiku ne’ebé deside mós atu koloka prokuradór sira ne’ebé iha esperiénsia barak ona iha Prokuradoria Distritál mai Kapitál Dili, hodi hasa’e prestasaun servisu ho kualidade no lais, tuir rezultadu retiru Ministériu Públiku nian.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here