Ministru Agrikultura no Peska, Joaquim José Gusmão dos Reis Martins. Imajen/Antonio Goncalves.

DILI, 12 fevereiru 2020 (TATOLI) – Ministru Agrikultura no Peska, Joaquim José Gusmão dos Reis Martins, hateten Ministériu Agrikultura no Peska (MAP) distribui ona ai-moruk Nasa litru 66 bá munisípiu sira hodi kombate peste ulat grayak ka spodoptera litura (F) ne’ebé maka hamate batar.

“Ita hahú distribui ona ai-moruk Nasa ho litru 66 bá to’os-na’in sira munisípiu hotu hodi kombate peste ulat grayak ne’ebé hamate batar”, governante ne’e dehan ba Ajénsia TATOLI hafoin reuniaun Konsellu Ministru iha Palásiu Governu, ohin.

Ho nune’e, estensionista sira iha munisípiu hotu inklui tékniku sira hahú fahe ona ai-moruk bá to’os-na’in, atubele kombate peste ne’ebé estraga batar, tanba peste ne’e eziste kleur ona, maibé garante katak ai-moruk ne’e bele kombate.

Nia esplika peste ne’e bainhira kona batar maka sei sai kinur, ezemplu; akontese iha Aileu no Laclo rezulta batar to’o mate de’it.

Nune’e mós, peste seluk hanaran for army one, ida ne’e MAP halo ona proposta ba Food and Agriculture Organization (FAO) atu apoia ai-moruk ruma, nune’e bele antesipa bainhira peste ne’e tama iha Timor-Leste, tanba durante ne’e, MAP halo ona mapeamentu hodi identifika peste, maibé seidauk iha.

“Ami hato’o ona proposta ba FAO no hein de’it resposta husi sira, maibé FAO ninia boot agora iha ne’e ona, karik aban ka bainrua ha’u sei halo enkontru ho nia hodi nune’e bele ajuda parte tékniku no mós ajudu operasionál nian hanesan fó ai-moruk, nune’e bele kombate peste for army one”, salienta.

Notísia relevante : MAP-FAO Sei Kombate Peste Batar

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here