Ministru Agrikultura no Peska (MAP), Joaquim Jose Gusmao dos Reis Martins. Imajen/ Jogerjo Guterres

DILI, 12 fevereiru 2020 (TATOLI) – Ministru Agrikultura no Peska, Joaquim José Gusmão dos Reis Martins, informa kansela ona importasaun fahi rasa hamutuk 150 husi Indonézia ne’ebé sosa husi Kompañia Mota Loes, Lda, tanba kauza husi fatór tolu.

Ministru dehan razaun tolu ne’ebé halo Ministériu Agrikultura no Peska (MAP) kansela importasaun fahi rasa ne’e tanba kompañia la tuir prazu importasaun, iha tinan ne’e (2020) ho Dotasaun Orsamentál Temporária (DOT) laiha orsamentu atu selu fahi rasa ne’e, no Timor-Leste mós afetadu hela  peste suína afrikana (ASF, sigla portugés).

“Momentu ita-nia aprovizionamentu fó tempu fulan tolu, maibé la konsege hatama, ita fó tan tempu fulan neen ate 31 dezembru 2019, maibé kompañia la konsege hatama mak obriga ita tenke kansela tanba ita laiha orsamentu tau iha tinan ne’e (2020) atu selu”, Ministru Joaquim afirma iha Palásiu Governu, Dili, ohin.

Nune’e, Ministru Joaquim dehan hein situasaun no orsamentu la’o di’ak hotu no virus ASF elimina iha Timor-Leste mak bele importa fali fahi hodi fó ba abitante sira liuliu benefisiáriu ne’ebé hatama ona proposta ba Diresaun Pekuária no Veterinária.

Iha 2019, Governu liuhusi MAP planeia atu sosa fahi rasa hamutuk 150 husi Indonézia ho orsamentu rihun $33 liuhosi fundu apoia ba joven ka komunidade sira.

Antes ne’e, Diretór Jerál Pekuária no Veterinária, Domingos Gusmão, dehan fahi rasa ne’e sosa husi kompañia Mota Loes, Lda, bazeia ba proposta husi Diresaun Jerál Pekuária no aprova husi Ministru Agrikultura no Peska, liuhusi konkursu no aprovizionamentu MAP nian.

Kritéria MAP nian atu fó fahi ba benefisiáriu ne’e, liuhusi proposta ne’ebé hatama ona husi grupu benefisiáriu iha munisípiu sira hanesan Ainaro, Manufahi, Covalima, Baucau, Viqueque, Liquiçá no Bobonaro inklui Ermera.  Enkuantu, munisípiu balun laiha tanba la hatama proposta.

Notísia relevante : MAP Sosa Fahi Rasa 150 husi Indonézia

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here