DILI, 12 fevereiru 2020 (TATOLI)–Xefe Estadu Maiór-Jenerál FALINTIL-Forsa Defeza Timor-Leste (F-FDTL), Majór-Jenerál Lere Anan Timur hato’o ba Prezidente Repúblika, Francisco Guterres Lú Olo katak, to’o oras ne’e, seidauk iha situasaun ida ne’ebé grave liu.
“Ha’u hasoru Prezidente Repúblika hodi relata kona-ba seguransa. To’o oras ne’e, seguransa rai-laran seidauk iha buat ida-ne’ebé mak grave liu. Loron hirak-ne’e situasaun kalma uitoan. Iha Laga, Munisípiu Baucau, mak iha semana kotuk ne’e joven balun duni malu no taa malu, maibé polísia bá to’o iha ne’ebá halo kedas atuasaun”, Lere haktuir ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e.
Lere fó-sai katak situasaun ne’ebé ema hotu sente inseguru iha rai-laran, bele grupu ki’ikoan balun mak kria ka hamosu situasaun ne’e.
“Ha’u nu’udar Xefe Estadu Maiór-Jenerál F-FDTL, hakarak apela de’it ba grupu ki’ikoan sira ne’ebé lakohi Timor nia independénsia, lalika provoka beibeik situasaun liuhusi mídia sosiál, facebook. Ema sira-ne’e sé-sé ne’e ami koñese hotu. Ha’u hakarak apela lalika provoka situasaun atu sai fatór instabilizadór iha ita-nia rai. Ha’u aviza ba sira, maibé se sira hakarak atu tenta nafatin, tenke prepara mós atu simu ninia konsekuénsia”, Lere apela.
Nia mós mensiona tan katak Timor ne’e hanesan nasaun ida-ne’ebé mak livre no independente, soberanu, tanba ne’e labele halimar ho soberania nasaun ida-ne’e nian.
Antes ne’e, Diretór Ezekutivu Sentru Estudu ba Pás no Dezenvolvimentu (CEPAD-sigla portugeza), João Boavida hateten katak Timor-Leste (TL) oras ne’e daudaun moris hela iha situasaun pás negativa.
Nia dehan, pás negativa ne’ebé mak agora enfrenta iha situasaun Timor, maka kilat la tarutu no kilat musan la semo.
Jornalista: Cipriano Colo
Editór: Xisto Freitas
