DILI, 11 fevereiru 2020 (TATOLI)–Diretór Eskola Ensinu Sekundária Téknika Vokasionál-Eskola Ekonomia no Komersiu (ESTV-EEC) Becora, Aderito Luis da Costa informa, kompania Fitun Roman Polmar, ne’ebé dadaun ne’e asina kontratu atu halo reabilitasaun ba eskola maibé agora daudaun serbisu ne’e abandona tanba mosu fali patraun ema na’in rua.

“Projetu ne’ebé mai halo ka hadi’a ami-nia eskola, projetu ne’e bos patraun ne’e ema na’in rua fali. Patraun na’in rua ne’e hanesan hafuhu malu fali,” dehan Diretór Eskola Ensinu Sekundária Téknika Vokasionál-Eskola Ekonomia no Komersiu (ESTV-EEC) Becora, Aderito Luis da Costa, ba Ajénsia TATOLI iha nia kna’ar fatin, Becora, ohin.

Nia hatutan, hahú eskola ne’e loke iha dezembru 2019 to’o ohin loron, eskola ne’e seidauk taka tomak no ai sira ne’e komesa dodok ba dada’uk.

“Loro-loron ha’u sempre xateia sira maibé patraun ne’e la’o lakon tiha to’o agora la mosu mai. Materiál sira ne’ebé presiza ba halo konstrusaun ne’e sira lakohi lori mai entaun traballadór sira atu serbisu mós araska oituan,” nia dehan.

Ba asuntu ida ne’e, nia informa, parte eskola relata ona ba Ministra Eduaksaun para bele hola desizaun lalais tun mai baze para bele haree ho matan rasik kona-ba kondisaun eskola ne’e oinsa.

Tanba, tuir nia, patraun ne’ebé asina akordu ho eskola ne’e atu hadi’a kontrusaun ne’e maibé to’o ikus nia haruka traballadór sira sobu hotu kalen sira ne’ebé taka netik uma-nia kakuluk to’o sira lakohi hadi’a fila fali.

“Tanba kalen ne’ebé di’ak, ha’u husu ba traballadór sira dehan katak sira la lori sasan mai, hanesan materiál mai no ami de’it mós sira la selu no sira mós la’o lakon tiha. Patraun na’in rua ne’e bolu ba mós sira na’in rua sisi ba malu. Katak, ida de’it mak hasai osan, ida seluk ne’ebé toma konta ba projetu ida ne’e halai lakon tiha,” nia haktuir.

Manorin na’in ne’e informa, momentu kopañia seidauk sobu kalen, ai sira ne’e nunka aat maibé agora sira sobu rahun tiha, udan no anin kona ai sira ne’e komesa mamuk, dodok no tohar.

“Ami hato’o liuhusi ida ne’e ba Ministériu Edukasaun para bele haruka sira-nia ekipa ida mai para bele haree direta ho matan rasik,” nia hateten.

Iha parte seluk, traballadór Juvito de Jesus Pereira hateten foufoun hadi’a kontrusaun ne’e komesa 13 novembru 2019 no iha dezembru 2019 mak sira taka kalen no restu ne’e sei hala’o iha jeneiru 2020 maibé kompañia ne’e hetan problema finanseiru.

“Iha konstrusaun ne’e rasik iha nia problema mak orsamentu. Ne’ebé, ami mós paradu hela to’o agora. Ami mós eziji hela kontrusaun ne’e atu la’o di’ak to’o agora durante fulan haat ona, nunka mais la’o,” nia infroma.

Nia haktuir, nu’udar traballadór ida nia mos sai komapañia ne’e nia vitima tanba konstrusaun moru la hotu no bele afeta ba komunkidade ka estudante sira iha eskola refere.

Entretantu, orsamentu ba halo reabilitasaun ba ESTV-EEC Becora ne’e hamutuk $241, 963.54 ne’ebé utiliza atu reabilita sala-de-aula neen (6) maibé agora daudaun serbisu ne’e la la’o tanba, fasilidade atu halo serbisu ne’e rasik laiha.

Jornalista : Nelia Fernandes

Editór       : Rafy Belo

1 KOMENTÁRIU

HAKEREK NO HATÁN

Please enter your comment!
Please enter your name here