Vise-Ministru Administrasaun Estatál, Abílio José Caetano. Imajen TATOLI/Egas Cristóvão

DILI, 12 fevereiru 2020 (TATOLI) – Iha reuniaun Konsellu Ministru kuarta ne’e, Ministru Administrasaun Estatál ein ezersísiu, Abílio José Caetano, aprezenta Projetu Dekretu Governu kona-ba kriasaun Portál Munisipál, ne’ebé relasiona ho prosesu Desentralizasaun Administrativa.

“Aprezenta Proposta Dekretu-Lei kona-ba Portál Munisipál, ne’ebé mai husi ajuda Uniaun Europeia (UE). Ho indikadór ne’e mak Governu Elektróniku, liuhosi modernizasaun Administrasaun Lokál”, tenik Abílio José Caetano iha Palásiu Governu hafoin reuniaun ezekutivu.

Governante ne’e esplika, Portál Munisipál hanesan website ba munisípiu hotu, ho karaktér transparénsia ba saida mak akontese iha munisípiu.

“Sei mosu profile munisípiu sira, dadus estatístiku kona-ba servisu munisipál ne’ebé mak iha no mós transparénsia ba finansa. Inklui bainhira iha projetu ruma ne’ebé halo aprovizionamentu iha nível munisipál, anúnsiu sira alein sei sai hanesan bain-bain, sei tau mós iha portál elektróniku ne’e”, nia realsa tan.

Nia dehan tan, bainhira iha rektutamentu ba vaga ruma, sei tau iha portál munisipál ne’e atu ema ne’ebé iha asesu iha internet bele asesu ba transparénsia.

“Ida ne’e ita bolu hanesan Portál Munisipál maibé ita bele mós bolu Transparénsia Munisipál”, nia akresenta.

Atuál Vise-Ministru Administrasaun Estatál ne’e informa liu tan, esforsu ne’ebé mak Governu liuhosi Ministériu Administrasaun Estatál (MAE) halo mak hetan ajudu orsamentu ne’ebé mai husi UE, maibé orsamentu ne’e aloka liuhosi United Nations Development Programme (UNDP).

“Portál Munisipál ne’e bele funsiona ona, maibé presiza legaliza liuhosi Dekretu-Lei, maibé ohin desizaun ba Dekretu-Lei ne’e Konsellu Ministru deside la’ós liuhosi Dekretu-Lei maibé presiza liu de’it husi Dekretu Governu. Nune’e, nível ezekutivu mak asina”, nia subliña.

Nune’e, Proposta ne’e pasa ho alterasaun balun ne’ebé ekipa MAE sira anota husi observasaun membru governu sira.

Entretantu, Portáll Munisipál disponibiliza públika informasaun munisipal ho forma ida atu apoia progresu no dezenvolvimentu munisipál iha termu sosiál, ekonómiku, infraestrutura no kulturál.

Portal ne’e konstitui mós hanesan instrumentu sentrál atu rekolla informasaun ho forma koerente.

Senralizada no transparente koba-ba munisípiu ida-idak ba produsaun informasaun estatétika iha área oioin, hanesan edukasaun, saúde, seguransa alimentár, obra públika no transporte, bee no saneamentu báziku no ambiente, agrikultura, jestaun ba merkadu no turizmu, asaun sosiál, protesaun sivíl, jestaun ba dezastre naturál, rejistu noariadu no serbisu kadastrál no apoiu ba organizasaun non governamentál no organizasaun komunitária sira.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here