Komunidade sira kuda ai-horis iha kintál eskola. Imajen: Nelia Fernandes

DILI, 11 fevereiru 2020 ( TATOLI)-Diretór Eskola Ensinu Sekundária Téknika Vokasionál-Eskola Ekonomia no Komérsiu (ESTV-EEC) Becora, Aderito Luis da Costa informa, dadaun ne’e komunidade sira ne’ebé hela iha eskola ne’e, kuda ai-horis iha kintál eskola nune’e prejúdika prosesu apredijajen la di’ak tanba, ai-horis ne’ebé kuda iha kintál eskola halo rai nakukun .

“Ami iha ne’e konstrusaun tama tiha ona iha ami-nia fatin eskola-nian balun ne’ebé aat maibé komunidade ne’ebé hela iha eskola laran, iha momentu ne’e Xefe Suku no Xefe Aldeia dehan sai maibé sira la sai nafatin to’o ohin loron, depois komunidade sei nafatin aumenta kuda ai-horis hanesan batar, hudi, fehuk entaun, ita haree eskola ne’ebé estadu hadi’a ita haree hanesan estadu la hadi’a, hanesan agora daudauk sira kuda duni, batar komesa bo’ot ona,” Diretór Aderito Luis da Costa, ba Agência TATOLI iha nia kna’ar fatin, Becora, ohin.

Diretór ESTV-EEC ne’e katak, durante eskola ne’e rasik bandu komunidade sira atu labele hela iha eskola inklui kuda ai-horis, mais to’o agora sira sei hela no kuda ai-horis kontinua.

“Ami bandu nafatin maibé ema ne’e ho ulun moruk dala ruma ita ejize no sateia beibeik, sira bele halo krime hasoru ita tanba ne’e ami hakarak hato’o ba Ministériu da Edukasaun hola medidas para sira tuun rasik ho sira-nia ekipa para fó hatene ba komunidade sira para bele hatene no persebe liután,” nia relata.

Nune’e, nia dehan, eskola ne’e mós lakohi sai vitima ba estadu nia sasan, bainhira ami ko’alia ami mak sai fali vitima.

“Iha momentu ne’e ami ko’alia ida ne’e, ami profesór sira-nia karreta mós sira baku rahun, kalan bo’ot, ne’ebé ami la hatene tanba toba lakon hotu ona, baku rahun karreta ne’e ita la koñese to’o ohin loron problema ne’e tama ona iha tribunál buka autór maibé seida’uk hetan,” nia akresenta.

Liuhusi ne’e, Diretór ESTV-EEC, Aderito Luis da Costa katak, ho problema ne’e hakarak atu Ministra da Edukasaun, Dulce de Jesus Soares atu bele foti medidas, ba asuntu ne’e.

“Ami hakarak atu informa de’it ba ami-nia Ministra da Edukasaun hola desizaun lalais ba komunidade sira ne’ebé liliu hela iha laran no komunidade ne’ebé husi li’ur tama mai laran kuda ai-horis halo to’os sai fali kintál ba fali sira nian,”nia hateten.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here