Xefe Bankada CNRT, Duarte Nunes. Imajen Tatoli/Egas Cristóvão

DILI, 12 fevereiru 2020 (TATOLI)—Xefe Bankada Parlamentár Partidu Congresso Nacional de Reconstrução de Timor (CNRT), Duarte Nunes, espera Prezidente Repúblika (PR), Francisco Guterres ‘Lú Olo’ bele konvida fali CNRT hodi kontinua ko’alia kona-ba situasaun polítika atuál.

“Ita espera katak sira iha leten hasoru-malu no ami mós espera katak Prezidente Repúblika sei konvida filafali ami (partidu CNRT) nune’e ita bele fó ita-nia kontribuisaun saida mak ami bele kontribui”, nia dehan ba jornalista sira, iha resintu Parlamentu Nasionál, kuarta ne’e.

Maibé, nia afirma, entermu buka-malu CNRT seidauk iha orientasaun tanba Prezidente Partidu CNRT, Kay Rala Xanana Gusmão ko’alia klaru ona ba públiku.

“CNRT nia pozisaun mak ne’e, atu buka-malu laiha karik, tanba ami buka ema depois ami tama ba ami haree de’it? Pozisaun Prezidente Repúblika la fó pose ba ami signifika bá-oin ami buka ema mós kolen saugati de’it. Ida-ne’e mak ami-nia pozisaun”, nia dehan hodi responde pedidu Prezidente Repúblika ne’ebé husu partidu polítiku asentu Parlamentár atu hahú movimentasaun polítika hodi solusiona impase polítika.

Nia haktuir, Prezidente CNRT dehan ona katak durante VIII Governu Prezidente Repúblika la fó pose membru Governu hosi CNRT sein razaun, signifika CNRT buka fali ema partidu sira seluk ba mós kolen saugati de’it.

“Ba opozisaun ami (CNRT) prontu. Ne’e klaru ona. Se partidu seluk buka hako’ak-malu aprezenta ba Xefe Estadu dehan bele, ami ne’ebé la bá tenke opozisaun. Ne’e laiha dalan seluk. Regra Parlamentu mak nune’e. Se sira sente iha forsa atu kaer ukun nusá mak ita labele fiar sira. Nasaun ne’e demokrasia mak hanesan ne’e”, Duarte afirma.

Xefe Bankada CNRT ne’e hateten, Prezidente Repúblika rona ona opiniaun hosi parte hotu, tanba ne’e Xefe Estadu sei foti desizaun ho justa.

“Ami fiar katak Prezidente Repúblika hatene ona dalan ne’ebé ke maioria komunga no hola desizaun tuir maioria nia hakarak. Ne’ebé, ita fiar Prezidente Repúblika sei bele buka solusaun ne’ebé ke justa no demokrátika ba ita-nia rai nia problema”, nia katak.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here